મુંબઈ: બોલિવૂડની સુંદર અને પ્રતિભાશાળી અભિનેત્રી મૃણાલ ઠાકુર હાલમાં તેની આગામી ફિલ્મ ‘દો દીવાને શહેર મેં’ ને લઈને ચર્ચામાં છે. પરંતુ, ફિલ્મની સાથે સાથે તેની પર્સનલ લાઈફ અને ખાસ કરીને તેના રિલેશનશિપ સ્ટેટસને લઈને સોશિયલ મીડિયા પર અનેક અટકળો વહેતી થઈ હતી. આ તમામ અફવાઓ પર હવે મૃણાલે અક્ષય કુમારના પ્રખ્યાત ગેમ શો ‘વ્હીલ ઓફ ફોર્ચ્યુન’ (Wheel of Fortune) માં દિલ ખોલીને વાત કરી છે.
અક્ષય કુમારની ગુગલી અને મૃણાલનો સિક્સર
શો દરમિયાન જ્યારે અક્ષય કુમારે મજાકિયા અંદાજમાં મૃણાલને ચીડવતા પૂછ્યું કે, "મૃણાલ, સોશિયલ મીડિયા પર તારા વિશે ઘણી વાતો થાય છે, તારું હાલનું રિલેશનશિપ સ્ટેટસ શું છે?" ત્યારે મૃણાલે કોઈપણ ખચકાટ વિના હસતા હસતા જવાબ આપ્યો હતો કે, "હું અત્યારે સંપૂર્ણપણે સિંગલ છું અને કોઈને મળવા (Ready to mingle) તૈયાર છું." મૃણાલના આ જવાબથી શોમાં ઉપસ્થિત દર્શકોમાં હાસ્યનું મોજું ફરી વળ્યું હતું.
ધનુષ સાથેના લગ્નની અફવાઓનો અંત
છેલ્લા કેટલાક સમયથી સોશિયલ મીડિયા પર એવી અફવાઓ જોર પકડતી હતી કે મૃણાલ ઠાકુર અને સાઉથના સુપરસ્ટાર ધનુષ જલ્દી જ લગ્ન કરવાના છે. જોકે, અક્ષયના શો પર આપેલા આ સ્પષ્ટ જવાબથી મૃણાલે આ તમામ અફવાઓને જડબાતોડ જવાબ આપી દીધો છે અને સ્પષ્ટ કર્યું છે કે તેના જીવનમાં હાલમાં કોઈ ખાસ વ્યક્તિ નથી.
'દો દીવાને શહેર મેં': ૨૦ ફેબ્રુઆરીએ રિલીઝ
મૃણાલ ઠાકુર અને સિદ્ધાંત ચતુર્વેદીની જોડી પ્રથમવાર રોમેન્ટિક ડ્રામા ‘દો દીવાને શહેર મેં’ માં જોવા મળશે. આ ફિલ્મ આધુનિક સમયની પ્રેમકથા છે, જે શીખવે છે કે પ્રેમમાં હંમેશા પરફેક્ટ હોવું જરૂરી નથી. રવિ ઉદયવર દ્વારા નિર્દેશિત અને સંજય લીલા ભણસાલી દ્વારા નિર્મિત આ ફિલ્મ ૨૦ ફેબ્રુઆરીએ સિનેમાઘરોમાં રિલીઝ થવા જઈ રહી છે. ફિલ્મમાં ઇલા અરુણ અને આચિંત કૌર જેવા દિગ્ગજ કલાકારો પણ મહત્વની ભૂમિકામાં છે.
મૃણાલના આ 'સિંગલ' સ્ટેટસના ખુલાસા બાદ તેના ચાહકોમાં ફરી એકવાર ઉત્તેજના જોવા મળી રહી છે. હવે જોવાનું એ રહેશે કે મૃણાલ અને સિદ્ધાંતની આ કેમેસ્ટ્રી પડદા પર પ્રેક્ષકોને કેટલી પસંદ આવે છે.