મુંબઈ: બોલિવૂડના ‘ખિલાડી’ અક્ષય કુમારના ચાહકો માટે એક રોમાંચક સમાચાર સામે આવ્યા છે. અક્ષયની મોસ્ટ એવેટેડ હોરર-કોમેડી ફિલ્મ ‘ભૂત બંગલા’ (Bhoot Bangla) ની રિલીઝ તારીખમાં મોટો ફેરફાર કરવામાં આવ્યો છે. અગાઉ આ ફિલ્મ 15 મે, 2026ના રોજ રિલીઝ થવાની હતી, પરંતુ હવે નિર્માતાઓએ તેને પ્રી-પોન કરીને 10 એપ્રિલ, 2026 ના રોજ સિનેમાઘરોમાં ઉતારવાનો નિર્ણય લીધો છે. અક્ષય કુમારે સોશિયલ મીડિયા પર એક અનોખો ટીઝર વીડિયો શેર કરીને આ જાહેરાત કરી છે, જેમાં એક કાળી બિલાડી મે મહિનાનું કેલેન્ડર ખંજવાળીને એપ્રિલ મહિનાની 10 તારીખ જાહેર કરતી જોવા મળે છે. અક્ષયે કેપ્શનમાં લખ્યું છે કે, "ભૂત બંગલા માટે કાઉન્ટડાઉન રીવાઇન્ડ!"

આ ફિલ્મની સૌથી મોટી ખાસિયત અક્ષય કુમાર અને દિગ્દર્શક પ્રિયદર્શનની જોડી છે. ‘હેરા ફેરી’ અને ‘ભૂલ ભુલૈયા’ જેવી બ્લોકબસ્ટર ફિલ્મો આપ્યાના 15 વર્ષ બાદ આ જોડી ફરી એકસાથે કામ કરી રહી છે. ફિલ્મના નિર્માતા એકતા કપૂરે પણ આ અંગે ઉત્સાહ વ્યક્ત કરતા સોશિયલ મીડિયા પર લખ્યું કે, "નાગિન પછી હવે ભૂત... આ જોડીને સાથે જોવા માટે અમે લાંબી રાહ જોઈ છે." નિર્માતાઓ માને છે કે એપ્રિલ મહિનામાં રિલીઝ કરવાથી ફિલ્મને બોક્સ ઓફિસ પર સોલો રન મળશે અને અન્ય કોઈ મોટી ફિલ્મ સાથે ટક્કર ન થતા કમાણીના તમામ રેકોર્ડ તૂટી શકે છે.

ફિલ્મની સ્ટાર કાસ્ટ પણ આકર્ષણનું કેન્દ્ર છે. અક્ષય કુમારની સાથે આ ફિલ્મમાં પરેશ રાવલ, રાજપાલ યાદવ અને અસરાની જેવા દિગ્ગજ કોમેડિયન ફરી એકવાર હસાવવા માટે તૈયાર છે. આ ઉપરાંત ફિલ્મમાં તબ્બુ, વામિકા ગબ્બી અને જીશુ સેનગુપ્તા પણ મહત્વના રોલમાં જોવા મળશે. ‘ભૂત બંગલા’નું શૂટિંગ રાજસ્થાન, જયપુર અને હૈદરાબાદના સુંદર લોકેશન્સ પર કરવામાં આવ્યું છે. બાલાજી મોશન પિક્ચર્સના બેનર હેઠળ બની રહેલી આ ફિલ્મ વર્ષ 2026ની બોલિવૂડની સૌથી મોટી હોરર-કોમેડી સાબિત થાય તેવું જણાઈ રહ્યું છે.

રસપ્રદ વાત એ છે કે, આ ફિલ્મની રિલીઝ ડેટમાં ત્રીજી વખત ફેરફાર થયો છે. શરૂઆતમાં તે 2 એપ્રિલે આવવાની હતી, ત્યારબાદ તેને મોડી કરીને 15 મે કરવામાં આવી અને હવે અંતે 10 એપ્રિલ નક્કી કરવામાં આવી છે. આ ફિલ્મ વર્ષ 2026માં અક્ષય કુમારની પહેલી રિલીઝ હશે, તેથી તેની સફળતા અક્ષય માટે ખૂબ જ મહત્વની માનવામાં આવે છે. શું અક્ષય અને પ્રિયદર્શનની જોડી ફરી એકવાર ‘ભૂલ ભુલૈયા’ જેવો જાદુ ચલાવી શકશે? તે જોવું રસપ્રદ રહેશે.