હૈદરાબાદ: 'બાહુબલી' અને 'RRR' જેવી ફિલ્મો દ્વારા ભારતીય સિનેમાને વિશ્વ સ્તરે ગૌરવ અપાવનાર દિગ્દર્શક એસ.એસ. રાજામૌલીએ તેમની આગામી મહાકાવ્ય સમાન ફિલ્મ ‘વારાણસી’ (Varanasi) વિશે ચોંકાવનારા ખુલાસા કર્યા છે. તેમણે પુષ્ટિ કરી છે કે આ ફિલ્મ સીધી રીતે રામાયણના પ્રસંગો પર આધારિત હશે. રાજામૌલીએ નમ્રતાપૂર્વક સ્વીકાર્યું હતું કે, તેમની અત્યાર સુધીની તમામ ફિલ્મોના મૂળમાં ભગવાન રામ અને રામાયણની પ્રેરણા રહેલી હોય છે.
રામાયણના વાસ્તવિક એપિસોડ પર આધારિત વાર્તા
રાજામૌલીએ એક ઈન્ટરનેશનલ મીડિયા હાઉસ સાથેની વાતચીતમાં જણાવ્યું કે, "આ ફિલ્મમાં મને રામાયણના એક વાસ્તવિક એપિસોડને આજના સંદર્ભમાં રજૂ કરવાની તક મળી છે." તેમણે સ્પષ્ટ કર્યું કે દર્શકોને પૌરાણિક કથાઓનું ઊંડું જ્ઞાન ન હોય તો પણ તેઓ પાત્રોની લાગણીઓ સાથે જોડાઈ શકશે. ફિલ્મનો મુખ્ય કેન્દ્રબિંદુ પિતા-પુત્રના અતૂટ સંબંધો હશે, જે ભગવાન રામ અને રાજા દશરથના બંધનનું પ્રતિબિંબ પાડે છે.
સ્ટાર કાસ્ટ અને પાત્રોની ઝલક
આ ફિલ્મમાં સુપરસ્ટાર મહેશ બાબુ ‘રુદ્ર’ નામના પાત્રમાં જોવા મળશે, જ્યારે ગ્લોબલ આઈકોન પ્રિયંકા ચોપરા ‘મંદાકિની’ નામની એક રહસ્યમય ચોરની ભૂમિકા ભજવશે. રાજામૌલીના મતે, આ પાત્રો વચ્ચેની કેમિસ્ટ્રી અને લાગણીઓ દર્શકોના હૃદયને સ્પર્શી જશે. આ ઉપરાંત મલયાલમ સુપરસ્ટાર પૃથ્વીરાજ સુકુમારન પણ આ ફિલ્મમાં મહત્વની ભૂમિકામાં જોવા મળશે.
વિશ્વ સ્તરનું વિઝ્યુઅલ સ્પેક્ટકલ
‘વારાણસી’ રાજામૌલીના અત્યાર સુધીના સૌથી મહત્વાકાંક્ષી પ્રોજેક્ટ્સમાંનો એક છે. આ ફિલ્મ ખાસ કરીને IMAX ફોર્મેટમાં શૂટ કરવામાં આવી રહી છે, જે ભારતીય સિનેમામાં વિઝ્યુઅલ ક્વોલિટીના નવા માપદંડો સ્થાપશે તેવું મનાય છે. ફિલ્મના સ્કેલ અને ભવ્યતાને જોતા ચાહકોમાં અત્યારથી જ ભારે ઉત્તેજના જોવા મળી રહી છે.
ક્યારે રિલીઝ થશે?
ફિલ્મની રિલીઝ માટે હજુ એક વર્ષથી વધુની રાહ જોવી પડશે. ‘વારાણસી’ 7 એપ્રિલ, 2027 ના રોજ વિશ્વભરના થિયેટરોમાં ધૂમ મચાવવા માટે તૈયાર છે. ભારતીય સંસ્કૃતિ અને આધુનિક ટેકનોલોજીનો આ સંગમ ફરી એકવાર બોક્સ ઓફિસના તમામ રેકોર્ડ તોડશે તેવી અપેક્ષા સેવાઈ રહી છે.