મુંબઈ: ફેબ્રુઆરી મહિનો એટલે કે પ્રેમનો મહિનો શરૂ થવાની તૈયારીમાં છે, અને આ વર્ષે વેલેન્ટાઈન ડે પર બોલિવૂડના ચાહકો માટે એક ખાસ ટ્રીટ આવી રહી છે. ગયા વર્ષે 'સનમ તેરી કસમ'ના રિ-રિલીઝને મળેલા જબરદસ્ત પ્રતિસાદ બાદ, નિર્માતાઓએ આ વખતે ઘણી કલ્ટ અને ક્લાસિક રોમેન્ટિક ફિલ્મોને ફરીથી સિનેમાઘરોમાં ઉતારવાનું નક્કી કર્યું છે. જેમાં સૌથી મોટું આકર્ષણ સલમાન ખાનની સુપરહિટ ફિલ્મ 'તેરે નામ' બની રહેશે.
'તેરે નામ' સાથે જૂની યાદો તાજી થશે
વર્ષ ૨૦૦૩માં જ્યારે 'તેરે નામ' રિલીઝ થઈ હતી, ત્યારે સલમાન ખાનના 'રાધે ભૈયા' અવતારે આખા દેશમાં ધૂમ મચાવી હતી. સલમાન ખાન અને ભૂમિકા ચાવલાની આ હૃદયસ્પર્શી લવ સ્ટોરી ૨૭ ફેબ્રુઆરી, ૨૦૨૬ ના રોજ ફરીથી મોટા પડદા પર રિલીઝ થવા જઈ રહી છે. આ સમાચાર આવતાની સાથે જ સોશિયલ મીડિયા પર ચાહકોમાં ભારે ઉત્તેજના જોવા મળી રહી છે.
દેવદાસ અને અન્ય ક્લાસિક ફિલ્મોનો જલવો
માત્ર સલમાન ખાન જ નહીં, પરંતુ બોલિવૂડના બાદશાહ શાહરૂખ ખાનની ભવ્ય ફિલ્મ 'દેવદાસ' પણ ફરીથી રિલીઝ થવાની તૈયારીમાં છે. આ ફિલ્મો જે-તે સમયે બ્લોકબસ્ટર રહી હતી અને આજે પણ યુવા પેઢીમાં લોકપ્રિય છે. સિનેમા હોલ્સમાં ફરી એકવાર તે જ જૂનો રોમાંસ, ગીતો અને ડ્રામા જોવા મળશે જે પ્રેક્ષકોને ૨૦૦૦ના દાયકાની યાદ અપાવશે.
કેમ વધ્યો રિ-રિલીઝનો ટ્રેન્ડ?
છેલ્લા કેટલાક સમયથી જૂની ફિલ્મોને ફરીથી રિલીઝ કરવાનો ટ્રેન્ડ વધ્યો છે. ફિલ્મી પંડિતોના મતે, નવી ફિલ્મો વચ્ચે જ્યારે કોઈ મજબૂત કન્ટેન્ટવાળી જૂની કલ્ટ ફિલ્મ આવે છે, ત્યારે પ્રેક્ષકો ખાસ કરીને સિનેમાના શોખીનો મોટા પડદા પર તે અનુભવ ફરી જીવવા માંગે છે. વેલેન્ટાઈન વીક હોવાને કારણે કપલ્સ માટે પણ આ એક શ્રેષ્ઠ વિકલ્પ બની રહેશે.