ટીવી અભિનેત્રી દેવોલીના ભટ્ટાચારજીએ પોતાના પુત્ર જોયના રંગ પર જાતિવાદી ટિપ્પણીઓ કરનારાઓ સામે મક્કમ વલણ અપનાવ્યું છે. સોશિયલ મીડિયા પર પુત્રને ટ્રોલ થતો જોઈને દુઃખી થયેલી અભિનેત્રીએ સાયબર ક્રાઇમમાં FIR નોંધાવી છે.
 
દેવોલીનાનું મૌન અને ટ્રોલર્સની હિંમત
દેવોલીનાએ જણાવ્યું કે, એક સેલિબ્રિટી તરીકે તે ટ્રોલિંગને સ્વીકારવા તૈયાર છે, પછી તે તેના કામ વિશે હોય કે જીવનશૈલી વિશે. પોતાના લગ્ન પર પણ સવાલો ઉઠ્યા ત્યારે તે ચૂપ રહી હતી કારણ કે તે તેનો અંગત નિર્ણય હતો. પરંતુ હવે તેણે કહ્યું કે, લોકોએ તેના મૌનને તેની નબળાઈ માની લીધું છે.

તેણે કહ્યું, "કેટલાક લોકો મારા પુત્ર જોયને નિશાન બનાવી રહ્યા છે અને જાતિવાદી ટિપ્પણીઓ કરી રહ્યા છે, જે એક ગુનો છે. હું જાણું છું કે જ્યારે મારો પુત્ર મોટો થશે, ત્યારે તે આવી પરિસ્થિતિઓનો બહાદુરીથી સામનો કરશે, કારણ કે તે મારો પુત્ર છે."
 
કાયદેસરની કાર્યવાહી અને ભવિષ્ય માટે સંદેશ
દેવોલીનાએ સોશિયલ મીડિયા પર નફરતથી ભરેલી ટિપ્પણીઓના સ્ક્રીનશોટ શેર કર્યા છે અને સાયબર ક્રાઈમમાં કેસ નોંધાવવાનો નિર્ણય લીધો છે. તેણે કહ્યું કે તે જાતિવાદ સામે કાર્યવાહી કરી રહી છે. તે એક એવા સમાજની આશા રાખે છે જ્યાં કોઈ ભેદભાવ ન હોય.

અભિનેત્રીએ કહ્યું કે તેણે કાયદાકીય માર્ગ અપનાવ્યો છે અને તે ખાતરી કરશે કે ટ્રોલર્સને સજા મળે. "હું ઇચ્છું છું કે ભવિષ્યમાં બીજા કોઈ માતાપિતા અને બાળકને આવી સમસ્યાનો સામનો ન કરવો પડે." તેણે સાયબર ક્રાઈમ ટીમનો પણ આભાર માન્યો, જે આ મામલાને ગંભીરતાથી લઈ રહી છે.