મુંબઈ,તા.૩૦: અભિષેક બચ્‍ચનની ફિલ્‍મી કરિયરને ૨૫ વર્ષ પૂરા થઈ રહ્યાં છે. આ પ્રસંગે પિતા અમિતાભ બચ્‍ચને દિલ ખોલી દીકરાના વખાણ કર્યા હતા. અમિતાભ બચ્‍ચન સોશિયલ મીડિયા પર પોતાના વિચારો વ્‍યક્‍ત કરતા રહે છે. અભિષેક બચ્‍ચનના અલગ-અલગ કેરેક્‍ટરને દર્શાવતો એક વીડિયો સોશિયલ મીડિયા પર શેર થયો હતો. આ વીડિયો ધ્‍યાનમાં આવ્‍યા પછી અમિતાભ બચ્‍ચનને દીકરા વિષે વાત કરવાની તક મળી હતી.

વીડિયોમાં અભિષેકે આટલા વર્ષો દરમિયાન રજૂ કરેલા અલગ-અલગ કેરેક્‍ટર્સની ઝલક હતી. કેપ્‍શનમાં અભિષેક બચ્‍ચનની કરિયરના ૨૫ વર્ષની ઉજવણીનો ઉલ્લેખ હતો. સાથે અભિષેકને વિટ, ટાઈમિંગ અને કોમિક સ્‍વેગના માસ્‍ટર તરીકે ઓળખાવવામાં આવ્‍યો હતો. આ પોસ્‍ટ પર રીએક્‍ટ કરતાં અમિતાભ બચ્‍ચને કહ્યું હતું કે, આ વેરાયટીને હું પ્રણામ કરુ છું અને મારા પુત્રની સરાહના કરુ છું. જી હાં, પિતા છું હું તેનો અને મારા માટે મારો પુત્ર અભિષેક સરાહના કરવા યોગ્‍ય છે. અન્‍ય એક પોસ્‍ટમાં અમિતાભ બચ્‍ચને અભિષેકની આગામી ફિલ્‍મોની વાત કરી હતી. તેમણે કહ્યું હતું કે, એક ફિલ્‍મ થોડા દિવસમાં રિલીઝ થવાની છે અને અન્‍ય ફિલ્‍મનું શૂટિંગ શરૂ થઈ ગયું છે. કિંગના શૂટિંગનો પહેલો દિવસ.. માય બ્‍લેસિંગ્‍સ ભૈયુ.

અભિષેક બચ્‍ચને જે પી દત્તાની ફિલ્‍મ રેફયુજી સાથે ૨૦૦૦માં કરિયર શરૂ કરી હતી. આ ફિલ્‍મમાં તેની સાથે કરીના કપૂર ખાન, જેકી શ્રોફ, સુનિલ શેટ્ટી અને અનુપમ ખેર મહત્ત્વના રોલમાં હતા. છેલ્લા બે દાયકામાં અભિષેકે ઓમ જય જગદીશ, એલઓસી કારગિલ, રન, યુવા બંટી ઔર બબલી, સરકાર, ધૂમ, દિલ્‍હી-૬, હેપ્‍પી ન્‍યૂ યર, બિગ બુલ અને આઈ વોન્‍ટ ટુ ટોક જેવી ફિલ્‍મો કરી છે. અભિષેકની આગામી ફિલ્‍મ કાલીધર લાપતા ૪ જુલાઈએ રિલીઝ થવાની છે. આ ફિલ્‍મમાં અભિષેકની સાથે મોહમ્‍મદ ઝીશાન અય્‍યુબ મહત્ત્વના રોલમાં છે. આ ફિલ્‍મમાં અભિષેકે મેમરી લોસથી પિડાતા આધેડનો રોલ કર્યો છે.(૪૦.૭)