<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" /> dasdasd
News of Wednesday, 18th November 2026

સલમાન ખાનના ચાહકો માટે મોટા ખુશખબર: 'માતૃભૂમિ'ની રિલીઝનો રસ્તો સાફ : સેન્સર બોર્ડે U/A 16+ સર્ટિફિકેટ આપી લગાવી મહોર

વારંવાર રિલીઝ ડેટ મોકૂફ રહ્યા બાદ આખરે 'માતૃભૂમિ: મે વોર રેસ્ટ ઇન પીસ'ને CBFC ની લીલી ઝંડી મળી : કર્નલ સંતોષ બાબુના દમદાર અવતારમાં જોવા મળશે સલમાન ખાન : હવે ૪ ડિસેમ્બરે સિનેમાઘરોમાં મચશે ધૂમ

મુંબઈ : બોલિવૂડના દબંગ સ્ટાર સલમાન ખાનની મોસ્ટ અવેટેડ ફિલ્મ 'માતૃભૂમિ: મે વોર રેસ્ટ ઇન પીસ'ની રિલીઝ સામેના તમામ અવરોધો આખરે દૂર થઈ ગયા છે. લાંબા સમયથી વિલંબ અને વારંવાર રિલીઝ ડેટ મોકૂફ રહેવાને કારણે ચાહકોમાં ભારે આતુરતા હતી, પરંતુ હવે સેન્ટ્રલ બોર્ડ ઓફ ફિલ્મ સર્ટિફિકેશન (CBFC) દ્વારા ફિલ્મને 'U/A 16+' સર્ટિફિકેટ આપી દેવામાં આવ્યું છે. આ મહત્વપૂર્ણ મંજૂરી મળતા જ ફિલ્મની રિલીઝનો રસ્તો સંપૂર્ણપણે સાફ થઈ ગયો છે અને હવે દર્શકો આગામી ૪ ડિસેમ્બરે સિનેમાઘરોમાં સલમાન ખાનની આ દેશભક્તિપૂર્ણ ફિલ્મનો આનંદ માણી શકશે. U/A 16+ સર્ટિફિકેટનો અર્થ એ છે કે ૧૬ વર્ષથી ઓછી ઉંમરના બાળકો પણ માતા-પિતાની દેખરેખ હેઠળ આ ફિલ્મ જોઈ શકશે, જે દર્શાવે છે કે સેન્સર બોર્ડે ફિલ્મના યુદ્ધના દ્રશ્યો અને એક્શનની તીવ્રતાને પરિવાર સાથે જોવાલાયક ગણાવી છે.

અપૂર્વ લાખિયાના દિગ્દર્શનમાં બનેલી અને સલમાન ખાનની માતા સલમા ખાન દ્વારા નિર્મિત આ ફિલ્મમાં સલમાન ખાન શહીદ કર્નલ સંતોષ બાબુની અત્યંત પ્રેરણાદાયી અને શૌર્યપૂર્ણ ભૂમિકા ભજવતા જોવા મળશે. અગાઉ જુલાઈ મહિનામાં એવી અફવાઓ ઉડી હતી કે ફિલ્મને સેન્સર બોર્ડ તરફથી કેટલીક સમસ્યાઓનો સામનો કરવો પડી રહ્યો છે, જોકે તે સમયે સલમાન ખાન ફિલ્મ્સે આ અહેવાલોને ફગાવી દીધા હતા અને હવે સર્ટિફિકેટ મળતા તમામ અટકળો પર કાયમી પૂર્ણવિરામ મુકાઈ ગયું છે. ફિલ્મમાં સલમાન ખાનની સાથે અભિનેત્રી ચિત્રાંગદા સિંહ મુખ્ય ભૂમિકામાં છે, જ્યારે દયાશંકર પાંડે, અભિલાષ ચૌધરી, હીરા સોહલ અને જેસન થામ સહિતના કલાકારો પણ મહત્વના પાત્રોમાં જોવા મળશે.

આ ફિલ્મનું સંગીત જાણીતા સંગીતકાર હિમેશ રેશમિયાએ તૈયાર કર્યું છે અને ફિલ્મનું ટાઇટલ ટ્રેક પણ 'માતૃભૂમિ' નામથી જ રાખવામાં આવ્યું છે, જે દર્શકોમાં દેશભક્તિનો જુસ્સો જગાવશે. સેન્સર બોર્ડની લીલી ઝંડી મળ્યા બાદ હવે મેકર્સ દ્વારા ફિલ્મના પ્રમોશન અને ટ્રેલર લોન્ચની તૈયારીઓ તેજ કરી દેવામાં આવી છે. આગામી દિવસોમાં સલમાન ખાન અને ફિલ્મની સમગ્ર સ્ટારકાસ્ટ દેશના વિવિધ શહેરોમાં પ્રમોશનલ ઇવેન્ટ્સ દ્વારા દર્શકો વચ્ચે જશે અને ૪ ડિસેમ્બરના રોજ બોક્સ ઓફિસ પર આ ફિલ્મ મોટા રેકોર્ડ સર્જશે તેવી પૂરી આશા સેવાઈ રહી છે.

(7:45 PM IST)