મુંબઇ : મ્યુઝિક ઈન્ડસ્ટ્રીના દિગ્ગજ સંગીતકાર અનિરુદ્ધ રવિચંદર અને આઈપીએલ (IPL) ફ્રેન્ચાઈઝી સનરાઇઝર્સ હૈદરાબાદના માલિક કાવ્યા મારન લગ્નના તાંતણે બંધાઈ ગયા છે. બંનેની લગ્ન જીવનની પહેલી તસવીર સામે આવતા જ સોશિયલ મીડિયા પર ખળભળાટ મચી ગયો છે. કપલે '11.11' ના ખાસ અંક અને 'માય વન્સ ઇન અ લાઇફટાઇમ, ફોર અ લાઇફટાઇમ' જેવા રોમેન્ટિક કેપ્શન સાથે આ પળને ચાહકો સાથે શેર કરી છે, જેને લઈને સોશિયલ મીડિયા પર ચર્ચાઓનું બજાર ગરમ છે.
પ્રાપ્ત વિગતો અનુસાર, આ ડ્રીમી વેડિંગ ગ્રીસના એક રમણીય સમુદ્રકિનારે અંગત રીતે યોજવામાં આવ્યા હતા. લગ્નની વાયરલ થયેલી તસવીરોમાં અનિરુદ્ધ આઇવરી રંગના કુર્તા-વેષ્ટી અને એમ્બ્રોઈડરીવાળી જેકેટમાં શાહી અંદાજમાં નજરે ચડે છે, જ્યારે કાવ્યા મારન બ્લશ પિંક રંગના સુંદર લહેંગા અને પરંપરાગત ઘરેણાંમાં અત્યંત આકર્ષક લાગી રહી છે. સફેદ અને પીળા ફૂલોથી સજાવેલા મંડપમાં હાથમાં હાથ નાખીને ચાલતા આ યુગલની તસવીરો ચાહકોનું દિલ જીતી રહી છે અને 'સન પિક્ચર્સે' પણ સત્તાવાર રીતે બંનેને શુભેચ્છાઓ પાઠવી છે.
આ સુંદર જોડીની લવ સ્ટોરી અને લગ્નની અચાનક સામે આવેલી ઝલકે મ્યુઝિક અને ક્રિકેટ જગતના કોરિડોરમાં ભારે કુતૂહલ સર્જ્યું છે. કાવ્યા મારન જ્યાં ક્રિકેટ જગતમાં પોતાની ઓળખ ધરાવે છે, તો બીજી તરફ અનિરુદ્ધ રવિચંદર પોતાના સુપરહિટ સંગીતથી દેશ-વિદેશમાં લાખો યુવાનોના દિલ પર રાજ કરે છે. બંનેની આ અનોખી જોડીના લગ્નના સમાચાર વાયુવેગે ફેલાતા જ ઈન્ટરનેટ પર શુભેચ્છાઓનો ધોધ વહી રહ્યો છે અને ચાહકો આ જોડીને ભવિષ્ય માટે વધાવી રહ્યા છે.
આ ભવ્ય અને અંગત ડેસ્ટિનેશન વેડિંગ બાદ હવે ટૂંક સમયમાં જ ચેન્નઈ અથવા હૈદરાબાદ ખાતે મ્યુઝિક અને ફિલ્મ જગતના દિગ્ગજો માટે એક શાનદાર રિસેપ્શન પાર્ટીનું આયોજન કરવામાં આવે તેવી પ્રબળ સંભાવના છે. ક્રિકેટ અને સિનેમા જગતની આ બે મોટી હસ્તીઓનું એક થવું ચાહકો માટે કોઈ પરીકથાથી કમ નથી, અને આગામી દિવસોમાં આ નવદંપતીના સત્તાવાર રિસેપ્શનના ફોટાઓ પર પણ સૌની નજર રહેશે.