મુંબઈ, તા.૧૧: ભારતીય સિનેમાના જાણીતા દિગ્દર્શક નિતેશ તિવારીના નિર્દેશનમાં બનેલી અને રણબીર કપૂર, યશ તથા સાઈ પલ્લવી જેવા દિગ્ગજ કલાકારોથી સજ્જ પૌરાણિક મેગા પ્રોજેક્ટ ફિલ્મ "રામાયણ: ભાગ ૧" હવે વૈશ્વિક સ્તરે ઓસ્કર એવોર્ડની રેસમાં ઝંપલાવવા માટે સંપૂર્ણપણે તૈયાર થઈ ગઈ છે.

પ્રાપ્ત વિગતો અનુસાર, ૯૯મા એકેડેમી એવોર્ડ્સ માટે ભારત તરફથી સત્તાવાર એન્ટ્રી તરીકે મરાઠી ફિલ્મ "ગોંધલ"ની પસંદગી કરવામાં આવી હોવા છતાં, "રામાયણ" ફિલ્મના નિર્માતાઓએ આ વૈશ્વિક પ્રતિષ્ઠિત મંચ પર સ્વતંત્ર રીતે પોતાની દાવેદારી નોંધાવીને ભારે આશ્ચર્ય સર્જ્યું છે.

ઓસ્કરના 'ઇન્ટરનેશનલ ફીચર ફિલ્મ' વિભાગમાં સામાન્ય રીતે "એક દેશ, એક ફિલ્મ"નો કડક નિયમ લાગુ પડતો હોય છે અને ફિલ્મ ફેડરેશન ઓફ ઇન્ડિયા દ્વારા માત્ર એક જ સત્તાવાર એન્ટ્રી મોકલવામાં આવે છે, પરંતુ આ નિયમ ઉપરાંત પણ ફિલ્મો સ્વતંત્ર રીતે જનરલ કેટેગરીમાં અરજી કરી શકે છે.

અગાઉ એસ. એસ. રાજામૌલીની બ્લબબસ્ટર ફિલ્મ 'આરઆરઆર' (RRR) ને પણ સત્તાવાર એન્ટ્રી ન મળવા છતાં સ્વતંત્ર રીતે સબમિટ કરવામાં આવી હતી અને તેના ગીત "નાટુ નાટુ"એ ઓસ્કર જીતીને ઇતિહાસ રચ્યો હતો, તેવી જ સફળ વ્યૂહરચના હેઠળ આ ફિલ્મને પણ ઉતારવામાં આવી છે.

સ્વતંત્ર ફિલ્મો માટે ઓસ્કરના કડક નિયમો મુજબ ફિલ્મને યુનાઇટેડ સ્ટેટ્સના નિર્ધારિત મોટા શહેરોના થિયેટરોમાં ઓછામાં ઓછા સતત સાત દિવસ સુધી પ્રદર્શિત કરવી ફરજિયાત હોય છે, જે શરત પૂરી કર્યા બાદ નિર્માતાઓ જનરલ એન્ટ્રી ફોર્મ સબમિટ કરી શકે છે.

સંસ્કૃતિ, ભવ્ય સેટ્સ અને અત્યાધુનિક ટેકનોલોજીના સંગમ સમાન આ મહાકાવ્ય આધારિત ફિલ્મ આગામી સમયમાં ઓસ્કરના મંચ પર ભારતીય સિનેમાનું ગૌરવ કઈ રીતે વધારે છે અને કેટલા એવોર્ડ પોતાના નામે કરે છે તેના પર સૌની નજર રહેશે.