મુંબઈ : દિગ્દર્શક નિતેશ તિવારી દ્વારા નિર્દેશિત અને બહુપ્રતીત પૌરાણિક ફિલ્મ 'રામાયણ' આજના દિવસે સિનેમાઘરોમાં રિલીઝ થઈ ચૂકી છે, ત્યારે ફિલ્મમાં ભગવાન રામની માતા કૌશલ્યાનું પાત્ર ભજવનાર અભિનેત્રી ઈન્દિરા કૃષ્ણને શૂટિંગના શરૂઆતના દિવસોની યાદો વાગોળતા કલાકારો સાથેના પ્રથમ 'રીડિંગ' સેશનની તસવીરો સોશિયલ મીડિયા પર શેર કરી છે.

આ ફિલ્મમાં રણબીર કપૂર ભગવાન રામની ભૂમિકામાં, સઈ પલ્લવી સીતાની ભૂમિકામાં અને સાઉથના સુપરસ્ટાર યશ રાવણની ભૂમિકામાં જોવા મળી રહ્યા છે, જેને લઈને સિનેમા પ્રેમીઓમાં પહેલેથી જ ભારે આતુરતા જોવા મળી રહી છે. રિલીઝના અવસરે ઈન્દિરા કૃષ્ણને પડદા પાછળની સુંદર ક્ષણોને યાદ કરતા પોતાના સહ-કલાકારો અને ક્રૂ મેમ્બર્સ પ્રત્યે આદરભાવ વ્યક્ત કર્યો છે.

રણબીર કપૂરના અભિનય અને વ્યક્તિત્વના વખાણ કરતા ઈન્દિરાએ જણાવ્યું હતું કે અગાઉ 'એનિમલ' જેવી બોલ્ડ ફિલ્મમાં શાનદાર અભિનય કરનાર રણબીરનું 'રામાયણ'માં ભગવાન રામ તરીકેનું પરિવર્તન ખરેખર પ્રશંસનીય છે અને તેઓ અંદર તથા બહારથી એક ખૂબ જ શુદ્ધ આત્મા ધરાવનાર સુંદર વ્યક્તિ છે.

આ ઉપરાંત, અભિનેત્રીએ સઈ પલ્લવીની નિર્દોષતા અને તેના આધ્યાત્મિક વિચારોની પણ પ્રશંસા કરી હતી તથા દિગ્દર્શક નિતેશ તિવારીના માર્ગદર્શન હેઠળ શૂટિંગ દરમિયાનના પોતાના અનુભવો શેર કર્યા હતા. ફિલ્મમાં રકુલ પ્રીત સિંહ સૂર્પણખાની ભૂમિકામાં છે, જ્યારે સની દેઓલ હનુમાન અને રવિ દુબે લક્ષ્મણના રોલમાં જોવા મળશે.

નમિત મલ્હોત્રાના 'પ્રાઈમ ફોકસ સ્ટુડિયો' અને ડીએનજીના સહયોગથી બનેલી આ ફિલ્મના નિર્માણમાં અત્યાધુનિક ટેકનોલોજી અને ૮૦થી વધુ કેમેરાનો ઉપયોગ કરવામાં આવ્યો છે, જે ભારતીય સિનેમાના ઇતિહાસમાં એક સીમાચિહ્નરૂપ સાબિત થઈ રહી છે.

આ ફિલ્મનો પ્રથમ ભાગ સિનેમાઘરોમાં ધૂમ મચાવી રહ્યો છે, ત્યારે દર્શકોમાં આ પૌરાણિક ગાથા પ્રત્યેનો ઉત્સાહ ચરમસીમાએ પહોંચ્યો છે, અને ફિલ્મના આગામી ભાગને લઈને પણ નિર્માતાઓ દ્વારા વર્ષ ૨૦૨૮ની યોજના જાહેર કરી દેવામાં આવી છે.