મુંબઈ : બોલિવૂડ અભિનેતા રણબીર કપૂર હાલમાં તેમની અત્યંત ચર્ચિત અને ડ્રીમ પ્રોજેક્ટ સમાન ફિલ્મ 'રામાયણ' ને લઈને સતત ચર્ચામાં છે. તાજેતરમાં દશેરાના એક પર્વ નિમિત્તે આયોજિત કાર્યક્રમમાં આપેલા તેમના નિવેદનને કારણે સોશિયલ મીડિયા પર ભારે હાસ્ય અને ટ્રોલિંગનો दौर શરૂ થયો છે. વાયરલ થયેલા વીડિયોમાં રણબીર સ્ટેજ પર બોલતા નજરે પડે છે કે, "દશેરા આપણને એક સુંદર વાત યાદ અપાવે છે કે, બુરાઈ ગમે તેટલી શક્તિશાળી કેમ ન હોય, આખિર મેં અંત સચ્ચાઈ ઔર અચ્છાઈ કી હી હોગી (અંતે સચ્ચાઈ અને અચ્છાઈનો જ અંત આવશે)."

વાસ્તવમાં રણબીર કપૂર કહેવા એ માંગતા હતા કે "સચ્ચાઈ અને અચ્છાઈની જ જીત થશે," પરંતુ જીભ લપસી જવાના કારણે 'જીત' ને બદલે 'અંત' શબ્દ બોલાઈ ગયો હતો. ફિલ્મમાં ભગવાન રામની પવિત્ર ભૂમિકા ભજવી રહેલા અભિનેતાની આ નાનકડી જીભ લપસવાની ઘટના સોશિયલ મીડિયા યુઝર્સો માટે મસાલો બની ગઈ. એક્સ (અગાઉનું ટ્વિટર) પર યુઝર્સે મજાક ઉડાડતા લખ્યું કે, "દશેરાના દિવસે રણબીર કપૂરે પોતે જ સચ્ચાઈ અને અચ્છાઈનો અંત લાવી દીધો!" તો અન્ય એક યુઝરે કટાક્ષ કર્યો કે ભાઈ, જો તમે આવી ભૂલો કરશો તો ફિલ્મ જોવા જવાનું વિચારતા લોકો પણ પીછેહઠ કરશે.

જોકે, આ સ્પષ્ટપણે માત્ર એક 'સ્લીપ ઓફ ટંગ' (બોલવામાં થયેલી ભૂલ) હતી, પરંતુ સોશિયલ મીડિયા પર સેલિબ્રિટીઓની ભૂલોને માફ ન કરનારા નેટીઝન્સે તેને ખૂબ વાયરલ કરી છે. આ તરફ વિવાદો અને ચર્ચાઓ વચ્ચે રણબીર કપૂર, સઈ પલ્લવી અને યશ અભિનિત આ ભવ્ય પૌરાણિક ફિલ્મ 'રામાયણ'નો પહેલો ભાગ આગામી ૫ નવેમ્બર, ૨૦૨૬ના રોજ સિનેમાઘરોમાં ધમાકો કરવા માટે તૈયાર છે. ફિલ્મને લઈને દર્શકોમાં કેટલો ભારે ઉત્સાહ છે તેનો અંદાજ એ વાત પરથી લગાવી શકાય કે તેના એડવાન્સ બુકિંગે રિલીઝના દિવસો અગાઉ જ રેકોર્ડ તોડવાનું શરૂ કરી દીધું છે. માત્ર ઓપનિંગ ડે માટે જ ૧ લાખથી વધુ ટિકિટો વેચાઈ ચૂકી છે, જેણે બોક્સ ઓફિસ પર ૫.૮૩ કરોડ રૂપિયાની શાનદાર કમાણી કરી લીધી છે.