ઋષિકેશ : બોલીવુડના ખેલાડી અક્ષય કુમાર માટે આ વર્ષ ખૂબ જ વ્યસ્ત અને ઉત્સાહવર્ધક રહ્યું છે. 'ભૂત બંગલા' અને 'વેલકમ ટુ જંગલ' જેવી ફિલ્મોની સફળતા બાદ હવે અક્ષય કુમાર પોતાની એક તદ્દન નવી ફિલ્મ પર પૂરજોશમાં કામ કરી રહ્યા છે. હાલમાં આ આગામી ફિલ્મના શૂટિંગ માટે અક્ષય કુમાર, રાશિ ખન્ના અને વિદ્યા બાલન ઉત્તરાખંડના મનોહર સ્થળો પર પહોંચ્યા છે, જ્યાં તેમના શૂટિંગના ફોટા અને વીડિયો સોશિયલ મીડિયા પર ભારે વાયરલ થઈ રહ્યા છે.

પ્રાપ્ત વિગતો અનુસાર, આ ફિલ્મના દિગ્દર્શનની ધુરા જાણીતા ડિરેક્ટર અનીઝ બઝ્મી સંભાળી રહ્યા છે. ફિલ્મમાં અક્ષય કુમાર સાથે રાશિ ખન્ના મુખ્ય ભૂમિકામાં નજરે પડશે, જ્યારે લાંબા સમયના બ્રેક બાદ અભિનેત્રી વિદ્યા બાલન પણ આ ફિલ્મ દ્વારા સિલ્વર સ્ક્રીન પર પુનરાગમન કરી રહી છે. હાલમાં આ ફિલ્મનું શૂટિંગ ઉત્તરાખંડના દેહરાદૂન, મસૂરી અને ઋષિકેશના રમણીય લોકેશન્સ પર ચાલી રહ્યું છે.

તાજેતરમાં જ અક્ષય કુમાર અને રાશિ ખન્ના ઉત્તરાખંડના પ્રખ્યાત સિંગટોલી પુલ અને તેની આસપાસના વિસ્તારમાં શૂટિંગ દરમિયાન નજરે પડ્યા હતા. કલાકારોની એક ઝલક મેળવવા માટે શૂટિંગ સ્થળ પર સ્થાનિક લોકો અને પ્રવાસીઓનો મોટો જમાવડો જોવા મળ્યો હતો. આ આઉટડોર લોકેશન પર ફિલ્મના એક ભવ્ય રોમેન્ટિક ગીતનું શૂટિંગ ચાલી રહ્યું છે, જેને લઈને ચર્ચા છે કે માત્ર આ એક જ ગીત પાછળ અંદાજે ૧ કરોડ રૂપિયાનો તોતિંગ ખર્ચ કરવામાં આવ્યો છે.

આ ભવ્ય ગીતની કોરિયોગ્રાફી જાણીતા નૃત્ય નિર્દેશક વિજય ગાંગુલી દ્વારા કરવામાં આવી છે અને તે ફિલ્મનું એક મહત્વપૂર્ણ પોસ્ટ-ક્રેડિટ ગીત હોવાનું મનાઈ રહ્યું છે. ફિલ્મના ટાઇટલ તેમજ આ ગીતના બોલ હજુ સુધી સત્તાવાર રીતે જાહેર કરવામાં આવ્યા નથી, પરંતુ સોશિયલ મીડિયા પર લીક થયેલા વીડિયોએ ચાહકોમાં ઉત્સુકતા બેવડી કરી દીધી છે.

દેહરાદૂન અને મસૂરીનું શેડ્યુલ પૂરું કરીને કાફલો ઋષિકેશ પહોંચ્યો છે. ફિલ્મની સ્ક્રિપ્ટ અને મેકિંગ પાછળ મેકર્સે ભારે ઝીણવટભરી તૈયારી કરી છે. ટૂંક સમયમાં જ નિર્માતાઓ દ્વારા ફિલ્મનું સત્તાવાર ટાઇટલ અને ટીઝર રિલીઝ કરવામાં આવે તેવી પૂરી શક્યતા છે. અક્ષય કુમારનો એકદમ નવો અને અંદાજ જોવા મળશે તેવી આશા સાથે દર્શકો આ ફિલ્મને લઈને અત્યારથી જ ભારે રોમાંચ અનુભવી રહ્યા છે.