મુંબઈ : બોલીવુડના દિગ્ગજ અભિનેતા અને રાજકારણી રાજ બબ્બર તેમની દિવંગત પત્ની તથા મહાન અભિનેત્રી સ્મિતા પાટીલની ૭૧મી જન્મજયંતી નિમિત્તે અત્યંત ભાવુક થઈ ગયા હતા. સ્મિતા પાટીલની જન્મજયંતીના પાવન અવસરે રાજ બબ્બરે સોશિયલ મીડિયા પર તેમની સુંદર તસવીર શેર કરીને એક હૃદયસ્પર્શી સંદેશ લખ્યો હતો. તેમણે સ્મિતાની અસાધારણ પ્રતિભા, પ્રેમાળ સ્વભાવ અને ભારતીય સિનેમા જગતમાં તેમના અતૂલ્ય યોગદાનને સન્માનપૂર્વક યાદ કર્યું હતું.

રાજ બબ્બરે સ્મિતા પાટીલને અત્યંત સંવેદનશીલ કલાકાર ગણાવતાં જણાવ્યું હતું કે તેમનામાં એક અદ્ભુત અને અવિસ્મરણીય સંવેદનશીલતા હતી. ભલે તેમની જીવનયાત્રા ખૂબ જ ટૂંકી રહી, પરંતુ પોતાની અદભુત અદાકારી અને કલાથી તેમણે દર્શકોના દિલ પર કાયમી છાપ છોડી છે. તેમણે માત્ર ફિલ્મી પડદે પાત્રો ભજવ્યાં જ નહોતાં, પરંતુ દરેક પાત્રના આત્મામાં જીવંત પ્રાણ ફૂંક્યા હતા. પત્નીની યાદમાં ભાવુક થયેલા રાજ બબ્બરે ઉમેર્યું હતું કે તેમને સ્મિતાની દરરોજ બહુ યાદ આવે છે અને તેમનો પ્રેમાળ સ્વભાવ તથા અનોખી વિશેષતાઓ આજે પણ તેમના સ્મરણોમાં જીવંત છે.

અભિનેત્રીએ પોતાના શાનદાર અભિનય થકી જે વારસો છોડ્યો છે તે આજે પણ યુવા કલાકારો અનેક પેઢીઓને પ્રેરણા આપી રહ્યો છે. કલાકારો ભલે શારીરિક રીતે આ દુનિયામાંથી વિદાય લે છે, પરંતુ સ્મિતા પાટીલ પોતાના સંપર્કમાં આવેલા દરેક વ્યક્તિના હૃદયમાં પોતાની છાપ છોડીને ગયાં છે, જે ક્યારેય ભૂલી શકાતી નથી.

ઉલ્લેખનીય છે કે રાજ બબ્બર અને સ્મિતા પાટીલની પ્રથમ મુલાકાત વર્ષ ૧૯૮૨માં રિલીઝ થયેલી ફિલ્મ 'ભીગી પલકે'ના સેટ પર થઈ હતી. આ જોડીને એક પુત્ર છે, જેનું નામ પ્રતિક બબ્બર છે અને તેનો જન્મ ૨૮ નવેમ્બર ૧૯૮૬ના રોજ થયો હતો. જોકે, દુર્ભાગ્યવશ પુત્રના જન્મના થોડા જ દિવસો બાદ ૧૩ ડિસેમ્બર ૧૯૮૬ના રોજ પ્રસૂતિ સંબંધિત જટિલતાઓને કારણે માત્ર ૩૧ વર્ષની નાની વયે સ્મિતા પાટીલનું આકસ્મિક નિધન થયું હતું. તેમના વસમી વિદાય બાદ પુત્ર પ્રતિકનો ઉછેર મુંબઈમાં તેના નાના-નાની દ્વારા કરવામાં આવ્યો હતો.

સ્મિતા પાટીલની યાદગાર ફિલ્મોમાં 'ગલિયો કા બાદશાહ' પણ સામેલ છે, જેમાં રાજ કુમાર, હેમા માલિની, મિથુન ચક્રવર્તી સહિતના નામાંકિત કલાકારોએ કામ કર્યું હતું. વર્ષો પહેલાં શૂટ થયેલી આ ફિલ્મ રિલીઝ થવામાં વિલંબ થયો હતો. બીજી તરફ, રાજ બબ્બર છેલ્લે વર્ષ ૨૦૨૪માં આવેલી ફિલ્મ 'એક કોરી પ્રેમ કથા'માં અભિનય કરતા નજરે પડ્યા હતા. સ્મિતા પાટીલની જન્મજયંતી પર સિનેમા જગતના દિગ્ગજો અને ચાહકોએ તેમને શ્રદ્ધાંજલિ પાઠવી હતી.