​મુંબઈ: સિનેમાઘરોમાં નવી ફિલ્મોની એન્ટ્રી થવા છતાં પણ ફિલ્મ ‘હનુમાન અંશ’ (Hanuman Ansh) તેની પકડ મજબૂત જાળવી રહી છે. સામાન્ય રીતે બે મહિનામાં ફિલ્મો થિયેટરોમાંથી બહાર થઈ જતી હોય છે, પરંતુ માત્ર 2 કરોડ રૂપિયાના બજેટમાં બનેલી આ ફિલ્મે રિલીઝના 71મા દિવસે પણ શાનદાર પ્રદર્શન ચાલુ રાખ્યું છે.

​71મા દિવસે કેટલું થયું કલેક્શન?

વિશાલ ચતુર્વેદીના નિર્દેશનમાં બનેલી ‘હનુમાન અંશ’ ફિલ્મે શુક્રવારે (16 ઓક્ટોબર) તેના થિયેટ્રિકલ રનના 71 દિવસ પૂરા કર્યા છે. સેકનિલ્ક (Sacnilk) ના રિપોર્ટ અનુસાર, આ ફિલ્મે 71મા દિવસે અંદાજે 12 લાખ રૂપિયાનું કલેક્શન કર્યું છે. થિયેટરોમાં નવી ફિલ્મોના વિકલ્પો આવવાના કારણે તેના શોમાં ચોક્કસપણે ઘટાડો થયો છે અને જ્યાં પહેલાં ૧,૦૦૦થી વધુ સ્ક્રીન પર આ ફિલ્મ દર્શાવવામાં આવતી હતી, ત્યાં 71મા દિવસે ફિલ્મના માત્ર 315 શો જ રહ્યાં હતા.

​ભારતમાં કલેક્શન રૂ. 400 કરોડ પાર

કમાણીની ઝડપ ધીમી પડી હોવા છતાં, ફિલ્મે એક મોટો માઇલસ્ટોન હાંસલ કર્યો છે. ભારતમાં ‘હનુમાન અંશ’નું કુલ ગ્રોસ કલેક્શન રૂ. 400.18 કરોડ સુધી પહોંચી ગયું છે, જ્યારે ભારતનું નેટ કલેક્શન રૂ. 339.10 કરોડ નોંધાયું છે.

​શું છે ‘હનુમાન અંશ’ની કહાની અને કલાકારો?

7 ઓગસ્ટે રિલીઝ થયેલી આ ફિલ્મ નીમ કરોલી બાબાના જીવનથી પ્રેરિત એક બાયોગ્રાફિકલ ફિલ્મ છે. આ ફિલ્મની પ્રેરણા નિર્દેશક વિશાલ ચતુર્વેદીના પુસ્તક 'Divine Detour: That Changed My Life' પરથી લેવામાં આવી છે. ફિલ્મનું લેખન અને નિર્દેશન વિશાલ ચતુર્વેદીએ કર્યું છે. જેમાં શોભિનવ સત્યા અને ચંદન આનંદ મુખ્ય ભૂમિકામાં છે, જ્યારે અનિલ રસ્તોગી, પૂર્ણિમા તિવારી, સુગંધા મલ્હોત્રા, ભગવાનદાસ પટેલ અને નેહા પરાંજપેએ મહત્વપૂર્ણ પાત્રો ભજવ્યા છે.

​નવી રિલીઝ થયેલી ફિલ્મોની પ્રથમ દિવસની કમાણી:

શુક્રવારે બોક્સ ઓફિસ પર રિલીઝ થયેલી ચાર નવી ફિલ્મોના પહેલા દિવસના અંદાજિત નેટ કલેક્શનના આંકડા નીચે મુજબ છે:

​જેલર 2 (Jailer 2): અંદાજે રૂ. 55.76 કરોડ
​રાણાબાલી (Ranabaali): અંદાજે રૂ. 4.80 કરોડ
​નવી નવેલી (Nayi Naveli): અંદાજે રૂ. 1.82 કરોડ
​પ્રહાર: ધ ઉજ્જવલ નિકમ (Prahaar): અંદાજે રૂ. 1.13 કરોડ