​નવી દિલ્હી/જલંધર: પ્રસિદ્ધ પંજાબી ગાયક અને અભિનેતા દિલજીત દોસાંઝના પંજાબના દોસાંઝ કલાં ગામ સ્થિત ઘર પાસે વિવાદાસ્પદ ખાલિસ્તાન સમર્થક સૂત્રો લખવામાં આવ્યા હોવાની ઘટના સામે આવી છે. આ ઘટના બાદ પોલીસ તંત્રમાં દોડધામ મચી ગઈ છે અને મામલાની ગંભીરતાથી તપાસ શરૂ કરવામાં આવી છે.

​મળતી માહિતી મુજબ, દિલજીત દોસાંઝ આગામી કેટલાક દિવસોમાં ભારતમાં પોતાના ચર્ચિત 'ઓરા ઈન્ડિયા ટૂર 2026'ની શરૂઆત કરવા જઈ રહ્યા છે, ત્યારે જ આ પ્રકારની ઘટના સામે આવવાથી સુરક્ષા અને તપાસ એજન્સીઓ સતર્ક થઈ ગઈ છે.

​ગામના જ એક રહેવાસીની દીવાલ પર લખાયા નારા

આ મામલે સામે આવેલી વિગતો અનુસાર, ખાલિસ્તાનના સમર્થનમાં લખાયેલા આ વિવાદાસ્પદ નારા વાસ્તવમાં દિલજીત દોસાંઝના નહીં, પરંતુ ગામમાં જ રહેતા મુખ્તિયાર નામના વ્યક્તિના ઘરની દીવાલ પર લખવામાં આવ્યા હતા. ડ્રાઈવર તરીકે કામ કરતા મુખ્તિયારે જણાવ્યું કે રાત્રે લગભગ ૧:૩૦ વાગ્યાની આસપાસ તેમને ઘરની બહાર સ્પ્રે પેઇન્ટની વાસ આવી હતી.

​જ્યારે તેઓ બહાર આવીને જોવા ગયા કે કોણ છે, ત્યારે તેમણે ચાર શખ્સોને દીવાલ પર નારા લખતા જોયા હતા. મુખ્તિયારે આ હરકતનો વિરોધ કરતા તે લોકો તુરંત ત્યાંથી ભાગી છૂટ્યા હતા. તેમણે આશંકા વ્યક્ત કરી છે કે તેમનું ઘર દિલજીત દોસાંઝના ઘરથી થોડી જ અંતરે આવેલું છે, જેના કારણે કદાચ તે શખ્સોએ ભૂલથી તેમના ઘરને સિંગરનું ઘર સમજીને ત્યાં આ નારા લખી દીધા હોય.

​પોલીસ દ્વારા સીસીટીવી ફૂટેજની તપાસ શરૂ

આ ઘટનાની જાણ થતાં જ ગોરાયા પોલીસ સ્ટેશનના અસિસ્ટન્ટ સબ-ઇન્સ્પેક્ટર (ASI) હરભજન સિંહ પોતાની ટીમ સાથે ઘટનાસ્થળે પહોંચ્યા હતા. પોલીસે જણાવ્યું છે કે આસપાસના વિસ્તારોના સીસીટીવી ફૂટેજની બારીકાઈથી તપાસ કરવામાં આવી રહી છે, જેથી આ કૃત્ય કરનાર અસલી આરોપીઓની ઓળખ થઈ શકે. પોલીસે સ્પષ્ટ કર્યું છે કે આ મામલે કાયદાકીય જોગવાઈઓ અનુસાર યોગ્ય અને સખત કાનૂની કાર્યવાહી કરવામાં આવશે.

​જલ્દી જ શરૂ થવાનો છે 'ઓરા ઈન્ડિયા ટૂર'

ઉલ્લેખનીય છે કે દિલજીત દોસાંઝ ભારતમાં તેમના મ્યુઝિકલ ટૂર 'ઓરા ટૂર'ની શરૂઆત કરવાની તૈયારી કરી રહ્યા છે. તેઓ ૧ નવેમ્બરથી દિલ્હી-NCRથી આ ટૂરની શરૂઆત કરશે. ત્યારબાદ તેઓ ઈન્દોર, અમદાવાદ, મુંબઈ, બેંગલુરુ અને લખનૌ સહિત દેશના અનેક મોટા શહેરોમાં પોતાના પર્ફોર્મન્સ આપવાના છે. આ ઉપરાંત ચંદીગઢમાં પણ તેમના એક કોન્સર્ટની જાહેરાત કરવામાં આવી ચૂકી છે. આંતરરાષ્ટ્રીય સ્તરે 'ઓરા વર્લ્ડ ટૂર'ની સફળતા બાદ ભારતમાં યોજાનારા આ કાર્યક્રમોને લઈને ચાહકોમાં ભારે ઉત્સાહ જોવા મળી રહ્યો છે.