મુંબઈ : બિગ બોસ ૨૦ ના ઘરમાંથી શરૂઆતના ત્રણ અઠવાડિયામાં જ બહાર થઈ ગયેલી અભિનેત્રી ઈશા રિખીએ તાજેતરમાં એક ઈન્ટરવ્યુ દરમિયાન અભિનેત્રી માહી વિજ દ્વારા કરવામાં આવેલી વિવાદાસ્પદ ટિપ્પણી સામે આકરો વિરોધ નોંધાવ્યો છે. ઘરમાં કાઝી તૌકીર સાથેની એક ઘટના બાદ ઈશાની પ્રતિક્રિયા પર માહી વિજે કટાક્ષ કરતા "બાદશાહ ને ઇસ્કે સાથ ક્યા કર દિયા" જેવું નિવેદન આપ્યું હતું, જેના પર પલટવાર કરતા ઈશાએ માહીના આ વર્તનને અપરિપક્વ ગણાવ્યું છે અને એક મહિલા તરીકે અન્ય મહિલાની સ્થિતિ સમજવાની સલાહ આપી છે.

માહીના આ નિવેદન અને પોતાના ભૂતપૂર્વ પતિ બાદશાહના ઉલ્લેખ પર પ્રતિક્રિયા આપતા ઈશાએ સ્પષ્ટતા કરી હતી કે તે પરિસ્થિતિ સંપૂર્ણપણે અલગ હતી અને કાઝી સાથે તેનો સંબંધ હંમેશાં આદરણીય રહ્યો છે. ઈશાના જણાવ્યા અનુસાર, કાઝીએ ક્યારેય તેનો અનાદર કર્યો ન હતો, પરંતુ જ્યારે તેણે ઘરમાં યુંગ (ડીએસએ) ના શરીર પર લોહી વહેતું જોયું, ત્યારે માનવતાના નાતે તેને અચાનક ગભરામણ થઈ ગઈ અને તેની પ્રતિક્રિયા થોડી વધુ પડતી તીવ્ર બની ગઈ હતી.

અભિનેત્રીએ વધુમાં જણાવ્યું હતું કે લોકો ઘણીવાર અધૂરી વિગતો જોઈને પરિસ્થિતિને ખોટી રીતે જોડી દે છે અને માહી વિજે પણ આ જ સંદર્ભમાં તેની મજાક ઉડાવી હતી. ઈશાએ નારાજગી વ્યક્ત કરતા કહ્યું કે દરેક વ્યક્તિની પોતાની એક વાર્તા અને અનુભવ હોય છે, અને જ્યારે કોઈ અન્ય સ્ત્રી જ આવી પરિસ્થિતિમાં સમજ્યા વગર ખોટા સંદર્ભો જોડીને ટિપ્પણી કરે છે, ત્યારે તે બિલકુલ યોગ્ય નથી લાગતું.

બિગ બોસના ઘરમાં થતી આવી ચર્ચાઓ અને સોશિયલ મીડિયા પર સેલેબ્સ વચ્ચેના વાદ-વિવાદો અગાઉ પણ ચર્ચાનો વિષય બનતા રહ્યા છે, ત્યારે ઈશાના આ ખુલાસા બાદ આ મામલો વધુ ગરમાયો છે. આગામી સમયમાં આ વિવાદ સોશિયલ મીડિયા પર કેટલો લાંબો ચાલે છે અને માહી વિજ તરફથી આ અંગે કોઈ પ્રતિક્રિયા આવે છે કે નહીં, તે જોવું રસપ્રદ રહેશે.