મુંબઈ : પાકિસ્તાનમાં પણ ભારતીય ફિલ્મોનો જાદુઈ ક્રેઝ શિરમોર સાબિત થઈ રહ્યો છે, જ્યાં હાલ નેટફ્લિક્સના ટોપ-૧૦ ટ્રેન્ડિંગ ચાર્ટમાં ૮ ભારતીય ફિલ્મો ધૂમ મચાવી રહી છે. સસ્પેન્સ થ્રિલર, હાસ્યથી ભરપૂર કોમેડી અને રોમેન્ટિક ફિલ્મોનો આ સમન્વય પાકિસ્તાની દર્શકોનું ભરપૂર મનોરંજન કરી રહ્યો છે. આ યાદીમાં હુમા કુરેશીની 'બેબી દો ડાઇ દો' એક સપ્તાહથી અને નેટફ્લિક્સની એન્થોલોજી ફિલ્મ 'લસ્ટ સ્ટોરીઝ ૩' બે સપ્તાહથી મજબૂત પકડ જમાવીને બેઠી છે.

આ યાદીને આગળ વધારતા સાઉથ અને બોલિવૂડની દિગ્ગજ ફિલ્મો પણ ભારે લોકપ્રિય થઈ રહી છે, જેમાં પિતા-પુત્રીના ભાવનાત્મક સંબંધો પર આધારિત તેલુગુ એક્શન થ્રિલર 'ઇરુમુડી' બે અઠવાડિયાથી અને અજય દેવગણ-સંજય મિશ્રા અભિનીત ધમાકેદાર કોમેડી ફિલ્મ 'ધમાલ 4' ચાર અઠવાડિયાથી ટોપ-૧૦માં ટ્રેન્ડ કરી રહી છે. આ ઉપરાંત તમિલ એક્શન રોમેન્ટિક ફિલ્મ 'વિશ્વનાથ એન્ડ સન્સ' ૨૧ દિવસથી જ્યારે તાપસી પન્નુની સ્ટનિંગ એક્શન થ્રિલર 'ગાંધારી' ચાર સપ્તાહથી દર્શકોની પહેલી પસંદ બની રહી છે.

આ સૂચિમાં મોટા સ્ટાર્સની ફિલ્મો પણ સામેલ છે, જેમાં આલિયા ભટ્ટ અને શર્વરી વાઘની સ્પાય થ્રિલર ફિલ્મ 'આલ્ફા' ભારતીય બોક્સ ઓફિસ પર અપેક્ષિત સફળતા ન મેળવી શકી હોવા છતાં પાકિસ્તાનમાં પાંચ અઠવાડિયા એટલે કે ૩૫ દિવસથી નેટફ્લિક્સ પર ટ્રેન્ડિંગમાં છે. બીજી તરફ, રશ્મિકા મંદાન્ના, શાહિદ કપૂર અને કૃતિ સેનન અભિનીત સુપરહિટ રોમેન્ટિક ફિલ્મ 'કોકટેલ ૨' તો તમામ રેકોર્ડ તોડતી હોય તેમ પૂરા ૭ અઠવાડિયા એટલે કે ૪૯ દિવસથી નેટફ્લિક્સની ટોપ-૧૦ યાદીમાં અગ્રેસર રહીને મોટો રેકોર્ડ બનાવી રહી છે.

ઓટીટી પ્લેટફોર્મ્સના માધ્યમથી સરહદોની આ પાર પણ ભારતીય કન્ટેન્ટની લોકપ્રિયતા સતત વધી રહી છે અને આ ફિલ્મોના વૈશ્વિક વ્યુઝ દર્શાવે છે કે કથા તેમજ કલાકારોનો જાદુ આંતરરાષ્ટ્રીય સ્તરે પણ અકબંધ છે. ભવિષ્યમાં પણ જો ઓટીટી પર આવી જ આકર્ષક અને વૈવિધ્યસભર ફિલ્મો રિલીઝ થતી રહેશે, તો પાકિસ્તાની સિનેમારસિકાઓમાં ભારતીય પ્રોજેક્ટ્સની આ ક્રેઝી લોકપ્રિયતા હજુ વધુ ઊંચાઈઓ સર કરશે તેવી પૂરી સંભાવના છે.