​હૈદરાબાદ:આધુનિક ટેક્નોલોજી અને આર્ટિફિશિયલ ઇન્ટેલિજન્સ (AI)ના વધતા ગેરઉપયોગ સામે ફિલ્મ ઈન્ડસ્ટ્રીના દિગ્ગજ કલાકારોમાં ભારે રોષ જોવા મળી રહ્યો છે. દક્ષિણ ભારતીય સિનેમાના સુપરસ્ટાર જુનિયર એનટીઆરે તેમની બ્લોકબસ્ટર ફિલ્મ 'દેવરા: પાર્ટ 1'ના ચર્ચિત ગીત 'ચુટ્ટામલ્લે'ના મોર્ફ કરેલા અને એઆઈ નિર્મિત ડીપફેક વીડિયો અંગે અત્યંત તીખી પ્રતિક્રિયા આપી છે. બોલિવૂડ અભિનેત્રી જાન્હવી કપૂર અને જુનિયર એનટીઆર પર ફિલ્માવાયેલા આ હિટ ગીતની વિઝ્યુઅલ ક્લિપ્સ સાથે છેડછાડ કરીને સોશિયલ મીડિયા પર વાયરલ કરવામાં આવતા સુપરસ્ટારે આ કૃત્યને 'ઘૃણાસ્પદ, બીમાર અને નિર્લજ્જ' ગણાવ્યું છે.

​પોતાના સત્તાવાર સોશિયલ મીડિયા હેન્ડલ પરથી આ મુદ્દે આકરા શબ્દોમાં વિરોધ નોંધાવતા જુનિયર એનટીઆરે સ્પષ્ટ ચેતવણી આપી છે કે આ અશ્લીલ અને મોર્ફ કરેલો વીડિયો બનાવનાર તેમજ તેને ડિજિટલ પ્લેટફોર્મ પર ફેલાવનાર તમામ તત્વો સામે તેઓ કાયદાકીય પગલાં ભરશે. તેમણે કહ્યું કે, "આ મોર્ફ કરેલા વીડિયો પાછળ જે લોકો છે તેમને હું કોઈપણ સંજોગોમાં છોડીશ નહીં. આ વીડિયો બનાવનારા અને તેને ફેલાવનારા તમામ લોકો સામે શક્ય તેટલી તમામ કાનૂની કાર્યવાહી કરવામાં આવશે."

​અભિનેતાએ સામાન્ય જનતા અને ચાહકોને પણ આ વીડિયો ન જોવાની તથા તેને આગળ શેર ન કરવાની નમ્ર વિનંતી કરી છે. સમાજમાં આ પ્રકારના સાયબર ક્રાઈમ પ્રત્યે ગંભીરતા દર્શાવતા તેમણે ઉમેર્યું હતું કે, "કૃપા કરીને આવા કન્ટેન્ટને જુઓ નહીં, શેર કરો નહીં કે તેની સાથે જોડાઓ નહીં. આજે કોઈ અન્ય વ્યક્તિ આનો ભોગ બની છે, કાલે તમારી માતા, બહેન, પત્ની કે પુત્રી પણ હોઈ શકે છે. આ એક અત્યંત ગંભીર બાબત છે."

​વધતા જતા એઆઈ ડીપફેકના જોખમને ધ્યાનમાં રાખીને જુનિયર એનટીઆરે દેશની તમામ રાજ્ય સરકારો તેમજ કેન્દ્ર સરકારને આ બાબતે તાત્કાલિક અને કડક પગલાં ભરવા અપીલ કરી છે. તેમણે ટેક્નોલોજીના આવા દૂષણ અને દુરૂપયોગને રોકવા માટે ચોક્કસ અને સખત કાયદાકીય નિયમો લાવવાની માંગ કરી છે.

​ઉલ્લેખનીય છે કે ફિલ્મ 'દેવરા'નું ગીત 'ચુટ્ટામલ્લે' તેના સુમધુર સંગીત અને અભિનેતા જુનિયર એનટીઆર તથા જાન્હવી કપૂર વચ્ચેની શાનદાર કેમિસ્ટ્રીને કારણે દર્શકોમાં ખૂબ જ લોકપ્રિય બન્યું હતું. પરંતુ તાજેતરમાં એઆઈ ટૂલ્સનો ઉપયોગ કરીને આ ગીતના દ્રશ્યોમાં ડિજિટલ ફેરફારો કરી વિકૃત વીડિયો તૈયાર કરવામાં આવ્યો હતો. સેલિબ્રિટીઝના ચહેરાઓનો ઉપયોગ કરીને બનાવવામાં આવતા આવા ડીપફેક વીડિયોથી સમગ્ર મનોરંજન જગતમાં ચિંતાનું મોજું ફરી વળ્યું છે.