મુંબઈ : દક્ષિણ ભારતીય સિનેમાના મેગાસ્ટાર રજનીકાંત પોતાની દમદાર એક્ટિંગ અને અનોખી સ્ટાઇલ ઉપરાંત પોતાની સાદગી માટે હંમેશા જાણીતા રહ્યા છે. ૭૫ વર્ષની વયે પણ તેમણે ફરી એકવાર સાબિત કરી દીધું છે કે તેઓ શા માટે કરોડો ચાહકોના હૃદય પર રાજ કરે છે. મંગળવારે રજનીકાંત તેમની આગામી હાઇ-વોલ્ટેજ એક્શન ફિલ્મ ‘ધર્મન’ના મૈસુર ખાતેના શૂટિંગ સેટ પર કોઈ લક્ઝરી કારને બદલે સામાન્ય ઓટોરિક્ષામાં સવાર થઈને પહોંચ્યા હતા. થલાઈવાને ઓટોરિક્ષામાંથી ઉતરતા જોઈને સેટ બહાર એકઠા થયેલા ચાહકો ઘેલા બન્યા હતા અને આ ક્ષણનો વીડિયો સોશિયલ મીડિયા પર વાયરલ થઈ રહ્યો છે.

ઘાટા મરૂન શર્ટ અને સફેદ ધોતીમાં સાદો અંદાજ

ઓટોરિક્ષામાંથી નીચે ઉતર્યા બાદ રજનીકાંતે અત્યંત નમ્રતાપૂર્વક હાથ ઊંચો કરીને ચાહકોનું અભિવાદન ઝીલ્યું હતું. ઘાટા મરૂન રંગના શર્ટ અને પરંપરાગત સફેદ ધોતીમાં સજ્જ રજનીકાંતને જોવા માટે ચાહકોએ ભારે હોબાળો મચાવ્યો હતો. સુરક્ષાકર્મીઓએ ભીડને કાબૂમાં રાખવા માટે ભારે કસરત કરવી પડી હતી. મૈસુરના આ શૂટિંગ સેટ પરથી સામે આવેલા અહેવાલો મુજબ, ફિલ્મમાં સાઉથના લોકપ્રિય કલાકારો રામ પોથિનેની અને શ્રીલીલા પણ મહત્વની ભૂમિકા ભજવી રહ્યા હોવાની ચર્ચા છે.

કમલ હાસનનું પ્રોડક્શન અને ડૉક્ટરનો અવતાર

ફિલ્મ ‘ધર્મન’નું દિગ્દર્શન ‘ઓહ માય કડાવુલે’ ફેમ અશ્વથ મારિમુથુ કરી રહ્યા છે, જ્યારે તેનું નિર્માણ સદીના મહાનાયક કમલ હાસનની પ્રોડક્શન કંપની 'રાજ કમલ ફિલ્મ્સ ઇન્ટરનેશનલ' દ્વારા કરવામાં આવી રહ્યું છે. જૂન ૨૦૨૬માં રિલીઝ થયેલા ફર્સ્ટ-લુક પોસ્ટરમાં રજનીકાંત હાથમાં લોહી સાથે એક ડૉક્ટરના લેડી-અવતાર/ગેટઅપમાં જોવા મળ્યા હતા. આ ફિલ્મમાં રજનીકાંત ઉપરાંત સિમરન, રાશિ ખન્ના અને કોમેડિયન યોગી બાબુ પણ મુખ્ય ભૂમિકામાં જોવા મળશે.

૧૫ ઓક્ટોબરે રિલીઝ થશે 'જેલર 2'

બીજી તરફ, રજનીકાંતના ચાહકો માટે ઓક્ટોબર મહિનો ડબલ ધમાકા સમાન છે. તેમની મલ્ટીસ્ટેરર ફિલ્મ ‘જેલર 2’ આગામી ૧૫ ઓક્ટોબર ૨૦૨૬ના રોજ વિશ્વભરના થિયેટરોમાં રિલીઝ થવા જઈ રહી છે. નેલ્સન દિલીપકુમાર દ્વારા નિર્દેશિત આ ફિલ્મમાં રજનીકાંત ફરી એકવાર ટાઈગર મુથુવેલ પાંડિયનના આક્રમક રોલમાં જોવા મળશે. આ ફિલ્મમાં વિદ્યા બાલન, વિજય સેતુપતિ, મિથુન ચક્રવર્તી, રામ્યા કૃષ્ણન અને એસ.જે. સૂર્યા જેવા ભારતીય સિનેમાના દિગ્ગજ કલાકારો સ્ક્રીન શેર કરતા જોવા મળશે.