મુંબઈ : વિશ્વના સૌથી લોકપ્રિય અને પ્રખ્યાત અમેરિકન યુટ્યુબર મિસ્ટરબીસ્ટ (MrBeast) હાલ ભારત પ્રવાસે મુંબઈ આવ્યા છે. બોલીવુડની મોસ્ટ અવેટેડ અને ભવ્ય ફિલ્મ 'રામાયણ'ના એક ખાસ કાર્યક્રમમાં હાજરી આપવા માટે તેઓ ખાસ ઉપસ્થિત રહ્યા હતા. આ હાઈપ્રોફાઈલ ઈવેન્ટમાં સુપરસ્ટાર રણબીર કપૂર, સાઈ પલ્લવી, રવિ દુબે, નિર્માતા નમિત મલ્હોત્રા અને દિગ્દર્શક નિતેશ તિવારી પણ હાજર રહ્યા હતા. કાર્યક્રમ દરમિયાન જ્યારે એક પાપારાઝીએ જોરથી "જય શ્રી રામ, મિસ્ટરબીસ્ટ" કહ્યું ત્યારે યુટ્યુબર થોડા અસમંજસમાં મુકાઈ ગયા હતા. આ ક્ષણે રણબીર કપૂરે તેમને પ્રેમથી "જય શ્રી રામ" કહીને અભિવાદન કરવાનો આગ્રહ કર્યો હતો, જેને મિસ્ટરબીસ્ટ તરત જ સ્વીકારીને લાગણીસભર સાદ આપ્યો હતો.

આટલું જ નહીં, રણબીરે મિસ્ટરબીસ્ટને ભારતીય સંસ્કૃતિ અને ભગવાન રામના જીવન ચરિત્ર વિશે સમજાવતાં કહ્યું હતું કે, "તેમનો જન્મ એક રાજકુમાર તરીકે થયો હતો અને તેમની પાસે તમામ સુખ-સાહબી હતી. પરંતુ પિતાનું વચન પાળવા અને ધર્મનું પાલન કરવા તેમણે ક્ષણભરમાં બધું જ ત્યજી દીધું હતું. તેઓ આદર્શ પુરુષ તરીકે પૂજાય છે અને મને આશા છે કે આ ફિલ્મ દ્વારા તમને અમારી સંસ્કૃતિ અને અમૂલ્ય ઇતિહાસનો પરિચય મળશે."

દિવાળી પર રિલીઝ થશે રામાયણ ભાગ-૧, એ.આર. રહેમાનના સંગીતે ધૂમ મચાવી

દિગ્દર્શક નિતેશ તિવારીની આ મહાકાવ્ય આધારિત ફિલ્મ બે ભાગમાં રજૂ થવા જઈ રહી છે. ફિલ્મનો પહેલો ભાગ આ જ વર્ષે દિવાળીના શુભ પર્વ પર સિનેમાઘરોમાં ધમાકેદાર રિલીઝ થશે, જ્યારે બીજો ભાગ ૨૦૨૭ની દિવાળી પર આવશે. તાજેતરમાં જ રિલીઝ થયેલા ફિલ્મના પહેલા ગીત 'જય જય રામ'ને દર્શકોનો અદભુત પ્રતિસાદ મળ્યો છે. એ.આર. રહેમાન દ્વારા કમ્પોઝ કરાયેલા અને શ્રેયા ઘોષાલ તથા અરિજિત સિંહના અવાજમાં સજ્જ આ ગીતે સોશિયલ મીડિયા પર ધૂમ મચાવી દીધી છે. રામાયણ ભાગ-૧ને લઈને દેશ-વિદેશના ચાહકોમાં ભારે ઉત્સુકતા જોવા મળી રહી છે.