​મુંબઈ: બોલિવૂડના જાણીતા દિગ્દર્શક રોહિત શેટ્ટી અને સુપરસ્ટાર અજય દેવગનની હિટ જોડી ફરી એકવાર દર્શકોને હસાવવા માટે સંપૂર્ણ રીતે સજ્જ થઈ ગઈ છે. ફિલ્મ ઈન્ડસ્ટ્રીની સૌથી લોકપ્રિય અને સફળ કોમેડી ફ્રેન્ચાઈઝીઓમાંની એક 'ગોલમાલ'ની પાંચમી કડી એટલે કે 'ગોલમાલ ૫' ને લઈને ફિલ્મ ચાહકો લાંબા સમયથી આતુરતાપૂર્વક રાહ જોઈ રહ્યા હતા. હવે આ ઈંતેજારનો અંત લાવતા નિર્માતાઓએ સત્તાવાર રીતે ફિલ્મની રિલીઝ ડેટ જાહેર કરી દીધી છે. 'ગોલમાલ ૫' વર્ષ ૨૦૨૭ના પ્રારંભે જ, એટલે કે ૮ જાન્યુઆરી ૨૦૨૭ના રોજ સિનેમાઘરોમાં રિલીઝ કરવામાં આવશે.

​ફિલ્મમેકર્સ અને સ્ટારકાસ્ટ દ્વારા સોશિયલ મીડિયા પર આ અંગેની ખાસ જાહેરાત કરવામાં આવી છે. રોહિત શેટ્ટીએ નવી પોસ્ટ શેર કરીને આ જાહેરાત કરતાં જણાવ્યું હતું કે, નવા વર્ષની શરૂઆત હાસ્ય, મનોરંજન અને મજાથી ભરપૂર રહેશે. આ વખતે પણ અજય દેવગન પોતાની આખી પલટન સાથે મોટો ધમાકો કરવા માટે આવી રહ્યા છે. આ એનાઉન્સમેન્ટ સાથે જ સિનેપ્રેમીઓ અને ગોલમાલ ફ્રેન્ચાઈઝીના ચાહકોમાં ઉત્સાહનો માહોલ જોવા મળી રહ્યો છે.

​ઉલ્લેખનીય છે કે 'ગોલમાલ' સીરિઝ તેની મનોરંજક સ્ટોરીલાઇન અને દમદાર કોમિક ટાઇમિંગ માટે ઓળખાય છે. 'ગોલમાલ ૫' માં અજય દેવગન સાથે અક્ષય કુમાર, અરશદ વારસી, કુણાલ ખેમૂ, તુષાર કપૂર અને શરમન જોશી જેવા કલાકારો પણ મહત્વપૂર્ણ ભૂમિકામાં જોવા મળશે. વર્ષ ૨૦૨૭ના પહેલા જ અઠવાડિયામાં રિલીઝ થઈ રહેલી આ ફિલ્મ બોક્સ ઓફિસ પર ધમાકેદાર કમાણી કરીને નવા રેકોર્ડ્સ સર્જશે તેવી પૂરેપૂરી શક્યતાઓ વ્યક્ત કરવામાં આવી રહી છે.