હૈદરાબાદ : સાઉથ સિનેમાના નેચરલ સ્ટાર તરીકે જાણીતા અભિનેતા નાની (Nani) ફરી એકવાર પોતાના અનોખા નિર્ણયોને કારણે ચર્ચામાં આવ્યા છે. તેમની આગામી બહુપ્રતિક્ષિત ફિલ્મ 'ધ પેરાડાઈઝ' (The Paradise) અંગે એક અત્યંત ચોંકાવનારો અને સાહસિક નિર્ણય લેવામાં આવ્યો છે. અભિનેતા નાનીએ જાહેરાત કરી છે કે ફિલ્મ રિલીઝ થતા પહેલા તેનું કોઈ જ સત્તાવાર ટ્રેલર (Trailer) લોન્ચ કરવામાં નહીં આવે. ભારતીય સિનેમામાં જ્યાં ફિલ્મના પ્રમોશન માટે ટ્રેલરને સૌથી મોટું હથિયાર માનવામાં આવે છે, ત્યાં આ નિર્ણયે સમગ્ર ફિલ્મ પ્રોડક્શન ક્ષેત્રમાં મોટું આશ્ચર્ય સર્જ્યું છે.

અભિનેતા નાનીએ આ બોલ્ડ નિર્ણય પાછળનું ખાસ કૂટનીતિક અને સૃજનાત્મક કારણ જણાવતા કહ્યું છે કે, આજકાલ ટ્રેલર્સમાં જ ફિલ્મની મુખ્ય વાર્તા, સસ્પેન્સ અને મહત્ત્વના દ્રશ્યો રજૂ થઈ જાય છે, જેના કારણે દર્શકો જ્યારે થિયેટરમાં જાય છે ત્યારે તેમની સરપ્રાઈઝ એલિમેન્ટ ઘટી જાય છે. 'ધ પેરાડાઈઝ' એક એવી ફિલ્મ છે જેનો વાસ્તવિક અનુભવ દર્શકોએ સીધો મોટા પડદા પર જ લેવો જોઈએ. ફિલ્મની વાર્તાનો થ્રિલ અને પ્લોટ થિયેટર સુધી અકબંધ રહે તે માટે ટ્રેલર ન રિલીઝ કરવાનો માસ્ટરપ્લાન ઘડવામાં આવ્યો છે.

ફિલ્મ નિર્માતાઓને પોતાના કન્ટેન્ટ અને સ્ટોરીટેલિંગ પર પૂરો ભરોસો છે. ફિલ્મનું પ્રમોશન ટ્રેલર વિના જ અનન્ય ટીઝર, મ્યુઝિક અને ખાસ ઈવેન્ટ્સ દ્વારા કરવામાં આવશે. ફિલ્મ ઇન્ડસ્ટ્રીના વિશ્લેષકોના મતે, ફિલ્મ માર્કેટિંગમાં આ એક મોટો અખતરો છે. જો આ રણનીતિ સફળ થશે, તો ભવિષ્યમાં અન્ય મોટા કલાકારો પણ પોતાની સસ્પેન્સ-થ્રિલર ફિલ્મો માટે આ જ મોડેલ અપનાવતા જોવા મળી શકે છે.

હાલમાં નાનીના આ નિર્ણયથી તેમના ચાહકોમાં ઉત્સુકતા ચરમસીમાએ પહોંચી ગઈ છે. લોકો એ જાણવા માટે બેતાબ છે કે આખરે 'ધ પેરાડાઈઝ'માં એવું તો શું ખાસ છે જેને નિર્માતાઓ રિલીઝ પહેલા ગુપ્ત રાખવા માંગે છે.