અમદાવાદ, તા. ૦૮: ભારતીય સિનેમાના સૌથી પ્રતિષ્ઠિત ૭૨મા રાષ્ટ્રીય ફિલ્મ પુરસ્કાર (72nd National Film Awards) સમારોહના સ્થળને લઈને સોશિયલ મીડિયા પર મોટો વિવાદ ઊભો થયો છે. દર વર્ષે નવી દિલ્હીના ઐતિહાસિક વિજ્ઞાન ભવનમાં યોજાતો આ ભવ્ય પુરસ્કાર સમારોહ આ વર્ષે ૨૨ સપ્ટેમ્બર, ૨૦૨૬ ના રોજ ગુજરાતના એકતા નગર (કેવડિયા) માં યોજાવાની સત્તાવાર જાહેરાત કરવામાં આવી છે. દિલ્હી બહાર સમારોહ યોજવાના આ નિર્ણય સામે બોલિવૂડના પ્રખ્યાત ફિલ્મ નિર્માતા રાહુલ ધોળકિયાએ (Rahul Dholakia) સોશિયલ મીડિયા પ્લેટફોર્મ X પર આકરા પ્રહારો કરીને વિરોધ નોંધાવ્યો છે.

રાહુલ ધોળકિયાએ ટ્વિટ કરીને સવાલ ઉઠાવ્યો હતો કે, "મને દિલ્હી સાથે કોઈ ખાસ પ્રેમ નથી, પરંતુ રાષ્ટ્રીય ફિલ્મ એવોર્ડ્સ ગુજરાતમાં ખસેડવાના નિર્ણય પર હું સવાલ ઉઠાવું છું. જો તમે વર્ષો જૂની પરંપરા તોડીને દિલ્હી બહાર સમારોહ લઈ જઈ રહ્યા છો, તો પછી જે રાજ્યોનું સિનેમા ક્ષેત્રે મોટું યોગદાન છે તેમને આ તક કેમ નહીં? મહારાષ્ટ્ર, કેરળ, તમિલનાડુ કે હૈદરાબાદ જેવા શહેરોને બદલે ગુજરાત જ શા માટે?" તેમની આ ટ્વિટ બાદ સોશિયલ મીડિયા પર નેટીઝન્સ બે જૂથમાં વહેંચાઈ ગયા છે અને ભારે બહેસ શરૂ થઈ ગઈ છે.

કેટલાક યુઝર્સે રાહુલ ધોળકિયાના સમર્થનમાં લખ્યું કે ફિલ્મ ઇન્ડસ્ટ્રીનો મુખ્ય આધાર મુંબઈ અને સાઉથ ઇન્ડિયા છે, તેથી એવોર્ડ ત્યાં યોજાવા જોઈએ. જ્યારે બીજા યુઝર્સે ગુજરાતનો બચાવ કરતાં લખ્યું કે એકતા નગર (સ્ટેચ્યુ ઓફ યુનિટી) એ વિશ્વકક્ષાનું સુંદર સ્થાન છે અને ત્યાં દરેક મોટા આયોજનનું સ્વાગત થવું જોઈએ. ઉલ્લેખનીય છે કે આ વર્ષે ૭૨મા નેશનલ ફિલ્મ એવોર્ડ્સમાં કાર્તિક આર્યન, યામી ગૌતમ, મામૂટી, આદિત્ય ધર અને રણદીપ હુડા જેવા દિગ્ગજ કલાકારોને સન્માનિત કરવામાં આવનાર છે, જેઓ એકતા નગર ખાતે યોજાનારા આ ભવ્ય સમારોહમાં હાજરી આપશે.