નવી દિલ્હી, તા.૦૭: બોક્સ ઓફિસ પર નીમ કરોલી બાબાના જીવન પર આધારિત ફિલ્મ 'હનુમાન અંશ' ની અપાર સફળતા અને ધમાકેદાર કમાણી બાદ, હવે ભારતીય સિનેમામાં વધુ એક આધ્યાત્મિક અને ભક્તિસભર ફિલ્મ આવવાની તૈયારી ચાલી રહી છે. દર્શકોના પ્રિય સંત શિરડીના 'સાઈ બાબા' ની પ્રેરણાદાયી ગાથા હવે મોટા પડદા પર જીવંત થવા જઈ રહી છે. બોલિવૂડના અત્યંત પ્રતિભાશાળી અને મંજીલા અભિનેતા સંજય મિશ્રા આ આગામી ફિલ્મમાં સાઈ બાબાની મુખ્ય ભૂમિકા ભજવતા નજરે પડશે.

અભિનેતા સંજય મિશ્રાએ પોતાના સત્તાવાર સોશિયલ મીડિયા એકાઉન્ટ પર તેમની આગામી ફિલ્મ "તેરા સાંઈ" (Tera Sai) નો પ્રથમ લુક જાહેર કરી દીધો છે. આ પોસ્ટરમાં તેઓ સાઈ બાબાના દિવ્ય અને શાંત સ્વરૂપમાં નજરે પડી રહ્યા છે, જેને જોઈને ફેન્સમાં ભારે ઉત્સાહ જોવા મળી રહ્યો છે. નિર્માતાઓના જણાવ્યા અનુસાર, આ ફિલ્મ માત્ર હિન્દી જ નહીં પરંતુ ચાર અલગ-અલગ ભાષાઓ એટલે કે હિન્દી, મરાઠી, તેલુગુ અને તમિલમાં ભવ્ય સ્તરે સિનેમાઘરોમાં રિલીઝ કરવામાં આવશે.

ફિલ્મના નિર્માણ અને રિલીઝની વાત કરીએ તો, આ ફિલ્મના દિગ્દર્શક પલાશ મુછલ છે, જ્યારે નિર્માણ શૈલેષ એસ. સંઘવી દ્વારા કરવામાં આવી રહ્યું છે. ફિલ્મનું પોસ્ટર શેર કરતા કેપ્શનમાં લખવામાં આવ્યું છે કે, "દરેકનો માસ્ટર એક છે." દર્શકોએ આ ફિલ્મ થિયેટરમાં જોવા માટે હજુ થોડી રાહ જોવી પડશે, કારણ કે આ ફિલ્મ આવતા વર્ષે ૫ ફેબ્રુઆરીએ સિનેમાઘરોમાં રીલીઝ થવા માટે સજ્જ થઈ રહી છે. અત્રે ઉલ્લેખનીય છે કે માત્ર રૂ. ૧.૭ કરોડના નાના બજેટમાં બનેલી 'હનુમાન અંશ' ફિલ્મે બોક્સ ઓફિસ પર રૂ. ૧૦૦ કરોડથી વધુની કમાણી કરીને ઇતિહાસ રચ્યો છે, જેથી 'તેરા સાંઈ' પાસેથી પણ દર્શકોને ભારે અપેક્ષાઓ છે.

આવી આધ્યાત્મિક અને ભક્તિસભર ફિલ્મો આજના યુવાનોમાં ભારતીય સંસ્કૃતિ અને આસ્થાને વધુ મજબૂત બનાવવામાં મદદ કરે છે.