મુંબઈ : શાહરૂખ ખાનની કારકિર્દીની સૌથી શાનદાર અને દેશભક્તિથી સભર ફિલ્મોમાં જેનું નામ ટોચ પર લેવાય છે તે ૨૦૦૪માં આવેલી 'સ્વદેશ' ફિલ્મ આજે પણ દર્શકોના દિલમાં એક ખાસ સ્થાન ધરાવે છે. જોકે, બોલિવૂડની આ આઇકોનિક ફિલ્મ સાથે જોડાયેલો એક અત્યંત રસપ્રદ ખુલાસો સામે આવ્યો છે. વાસ્તવમાં આ ફિલ્મની શરૂઆત શાહરૂખ ખાન માટે થઈ જ ન હતી! ફિલ્મની સ્ક્રિપ્ટ કિંગ ખાન સુધી પહોંચે તે પહેલાં બોલિવૂડના અન્ય ત્રણ દિગ્ગજ સુપરસ્ટાર્સના હાથમાંથી પસાર થઈ ચૂકી હતી.

આમિર ખાન અને 'દેશ' ટાઈટલ:

ફિલ્મના લેખક અને અભિનેતા અમિન હજીના ખુલાસા મુજબ, નિયામક આશુતોષ ગોવારિકરે 'લગાન'ની અભૂતપૂર્વ સફળતા બાદ આ સ્ક્રિપ્ટ આમિર ખાનને ધ્યાનમાં રાખીને જ લખી હતી. તે સમયે આ ફિલ્મનું નામ 'સ્વદેશ' નહીં પરંતુ 'દેશ' નક્કી કરવામાં આવ્યું હતું. જોકે, પ્રોડક્શનના કેટલાક મુદાઓ અને ટાઈમિંગની અછતને કારણે આમિર ખાન આ પ્રોજેક્ટ સાથે જોડાઈ શક્યા નહીં.

હૃતિક રોશનથી લઈને આર. માધવન સુધી પહોંચી સ્ક્રિપ્ટ:

આમિર બાદ આ ફિલ્મની સ્ક્રિપ્ટ હૃતિક રોશન પાસે ગઈ હતી. બીજી તરફ આર. માધવને પણ આ પાત્ર માટે ઓડિશન આપ્યું હતું. અમિન હજીના જણાવ્યા મુજબ, માધવનનું ઓડિશન એટલું બધું પરફેક્ટ હતું કે તેઓ આજે પણ તેની પ્રશંસા કરે છે. છતાં પણ કિસ્મતને કંઈક અલગ જ મંજૂર હતું.

શાહરૂખ ખાનની ઈચ્છા અને ઈતિહાસ સર્જાયો:

દરમિયાન, શાહરૂખ ખાને પોતે જ સામે ચાલીને આશુતોષ ગોવારિકરનો સંપર્ક કર્યો અને તેમની આગામી ફિલ્મમાં કામ કરવાની તીવ્ર ઈચ્છા વ્યક્ત કરી. ત્યારબાદ 'મોહન ભાર્ગવ'નું પાત્ર શાહરૂખના ફાળે આવ્યું અને જે પરિણામ આવ્યું તે ભારતીય સિનેમાના ઈતિહાસનો સુવર્ણ અધ્યાય બની ગયું.

નાસા (NASA) ના સ્પેસ સેન્ટર ખાતે શૂટ થયેલી આ ફિલ્મમાં ગાયત્રી જોશીએ મુખ્ય અભિનેત્રી તરીકે કામ કર્યું હતું. બોક્સ ઓફિસ પર ભલે તત્કાલીન સમયે સરેરાશ કમાણી રહી હોય, પરંતુ સમય સાથે 'સ્વદેશ' આજે દરેક ભારતીયના દિલમાં કલ્ટ ક્લાસિક ફિલ્મ તરીકે અમર થઈ ગઈ છે.