મુંબઈ : મનોરંજન જગતમાં પોતાના બેબાક વિચારો માટે જાણીતા લોકપ્રિય અભિનેતા મુકેશ ખન્નાએ વધુ એક વખત ચર્ચાનું કેન્દ્ર બન્યા છે. આ વખતે તેમનો ગુસ્સો વરિષ્ઠ અભિનેત્રી શર્મિલા ટાગોર પર ફૂટ્યો છે, જેમણે તાજેતરમાં 'વંદે માતરમ' અંગે એક વિવાદાસ્પદ વિચાર રજૂ કર્યો હતો. મુકેશ ખન્નાએ આ મુદ્દે અભિનેત્રીની ઝાટકણી કાઢી છે અને તેમના લગ્ન તેમજ બંગાળી મૂળને લઈને ઘણા સવાલો ઉઠાવ્યા છે.

વિવાદની શરૂઆત શર્મિલા ટાગોરના એ નિવેદનથી થઈ જેમાં તેમણે કહ્યું હતું કે ભારતની ધાર્મિક વિવિધતાને ધ્યાનમાં રાખીને 'વંદે માતરમ'ના માત્ર પ્રારંભિક શ્લોકો જ ગાવા જોઈએ. આ વાતનો વિરોધ કરતા મુકેશ ખન્નાએ એક મુલાકાતમાં આકરા પ્રહારો કર્યા હતા. તેમણે કહ્યું કે અભિનેત્રી પોતાની સમજ મુજબ બોલી રહી છે, પરંતુ એ વાત સમજાતી નથી કે તેમને અચાનક અન્ય ધર્મોની ચિંતા કેમ સતાવવા લાગી છે.

આ વાતને આગળ વધારતા મુકેશ ખન્નાએ શર્મિલા ટાગોરના પટૌડી પરિવારમાં થયેલા લગ્નનો ઉલ્લેખ કર્યો અને તેમને આયશા બેગમ કહીને સંબોધિત કર્યા. તેમણે તીખા અવાજે પૂછ્યું કે શું તેમને લગ્ન પછી જ ખબર પડી કે ઇસ્લામ પણ અસ્તિત્વમાં છે? બેગમ બન્યા પછી જ તેમને કેમ એવો અહેસાસ થયો કે મુસ્લિમો અલગ ધર્મ પાળે છે? તેમણે આશ્ચર્ય વ્યક્ત કર્યું કે હિન્દુ ધર્મમાં આખું જીવન વિતાવ્યા બાદ આજે આ પ્રકારનું વલણ કેમ સામે આવી રહ્યું છે.

અભિનેતાએ શર્મિલા ટાગોરના બંગાળી મૂળનો પણ ઉલ્લેખ કર્યો અને કહ્યું કે તે એવા બંગાળમાં મોટી થઈ છે જ્યાં માતા કાલીની પૂજા મોટા પાયે થાય છે. બંગાળી સંસ્કૃતિ અને ફિલ્મો વચ્ચે ઉછરેલી અભિનેત્રીને હવે શા માટે એવું લાગે છે કે બીજા ધર્મના લોકો આ સ્વીકારશે નહીં? આ ઉપરાંત, મુકેશ ખન્નાએ હિન્દુ ધર્મની વ્યાખ્યા આપતા જણાવ્યું કે આપણા દેશમાં ભલે અનેક દેવી-દેવતાઓ હોય, પરંતુ અંતિમ શક્તિ એક જ નિરાકાર ઈશ્વરની છે.

અંતમાં મુકેશ ખન્નાએ દેશમાં ચાલી રહેલી તુષ્ટિકરણની રાજનીતિની પણ આકરી ટીકા કરી હતી. તેમણે કહ્યું કે લોકો પોતાના સિદ્ધાંતો છોડીને માત્ર રાજકીય ફાયદા માટે તુષ્ટિકરણ કરે છે. માતૃભૂમિને નમન કરવાના આ પવિત્ર ગીત સામે આવો વિરોધ કરવો અને તેને મર્યાદિત કરવાની વાત કરવી તે અત્યંત નિરાશાજનક બાબત છે.