આગ્રા, તા.૦૨: વર્ષ ૨૦૨૬ ની સૌથી વધુ નફો રળનારી અને અણધારી સફળતા મેળવનારી ફિલ્મોમાંની એક એવી 'હનુમાન અંશ' ના ચાહકો માટે એક અતિશય ઉત્સાહજનક અપડેટ સામે આવ્યું છે. પૂજનીય નીમ કરોલી બાબાના આશીર્વાદ અને જીવન પર આધારિત આ સુપરહિત ફિલ્મની સિક્વલ (ભાગ-૨) ની સત્તાવાર જાહેરાત કરવામાં આવી છે. ફિલ્મના નિર્દેશક વિશાલ ચતુર્વેદીએ આગ્રાના એક મલ્ટિપ્લેક્સમાં દર્શકો સાથે વાતચીત દરમિયાન આ રોમાંચક સમાચારની પુષ્ટિ કરી છે.

ડિરેક્ટરે જણાવ્યું હતું કે 'હનુમાન અંશ ૨' માં બાબાના જીવનના વધુ ઊંડા અને મહત્વપૂર્ણ પ્રકરણો પ્રદર્શિત કરવામાં આવશે. સિક્વલની વાર્તા બાબાના જન્મસ્થળ ફિરોઝાબાદથી શરૂ થઈને આગ્રા, મથુરા અને તેમની આધ્યાત્મિક યાત્રા સાથે જોડાયેલા અન્ય પવિત્ર સ્થળોની સફર કરાવશે. શોભિનવ સત્યા અભિનીત આ ફિલ્મે કોઈપણ મોટા પ્રમોશન વગર સિનેમાઘરોમાં પ્રવેશ કર્યો હતો અને ત્રીજા અઠવાડિયાથી બોક્સ ઓફિસ પર ચમત્કારિક ઉછાળો નોંધાવ્યો હતો.

કંગના રનૌતે આપી પ્રતિક્રિયા અને બોક્સ ઓફિસ પર દબદબો

પ્રખ્યાત અભિનેત્રી કંગના રનૌતે પણ આ ફિલ્મની સોશિયલ મીડિયા પર પ્રશંસા કરતા લખ્યું હતું કે, "#હનુમાન અંશ કોઈ સામાન્ય ફિલ્મ નથી પણ એક સાક્ષાત સત્સંગ છે. તમારી થેરાપી છોડીને આ ફિલ્મ જોવા પહોંચી જાઓ."

૭ ઓગસ્ટ, ૨૦૨૬ ના રોજ રિલીઝ થયેલી આ ફિલ્મે માત્ર ૨ કરોડના મામૂલી બજેટ સામે અત્યાર સુધીમાં ૫૪.૧૩ કરોડ રૂપિયાની તોતિંગ કમાણી કરી લીધી છે. મોટી આંતરરાષ્ટ્રીય અને સાઉથની ફિલ્મોની સ્પર્ધા હોવા છતાં, હનુમાન અંશ થિયેટરોમાં હાઉસફુલ જઈ રહી છે અને હવે દર્શકો તેના બીજા ભાગની આતુરતાપૂર્વક રાહ જોઈ રહ્યા છે.