મુંબઈ: મહારાષ્ટ્ર ફૂડ એન્ડ ડ્રગ એડમિનિસ્ટ્રેશન દ્વારા પ્રતિબંધિત પાન મસાલાના પરોક્ષ પ્રમોશનની શંકાના આધારે બોલિવૂડ સુપરસ્ટાર શાહરૂખ ખાન, અજય દેવગણ અને ટાઇગર શ્રોફને ‘વિમલ ઈલાયચી’ની જાહેરાત બાબતે કારણદર્શક નોટિસ ફટકારવામાં આવી છે. રાજ્યમાં પાન મસાલા પર લાદવામાં આવેલા એક વર્ષના કડક પ્રતિબંધ વચ્ચે ઓનલાઈન અને અન્ય મીડિયા પ્લેટફોર્મ પર પ્રસારિત થતી આ જાહેરાતોમાં ત્રણેય કલાકારોની ભૂમિકા અંગે સ્પષ્ટતા માંગવામાં આવી છે.

મહારાષ્ટ્ર એફડીએના જણાવ્યા અનુસાર, ‘વિમલ’ બ્રાન્ડનું નામ અને તેનું પ્રમોશન એવી રીતે કરવામાં આવ્યું છે કે જે દર્શકોના મનમાં પ્રતિબંધિત પાન મસાલા સાથે તેનું જોડાણ ઊભું કરે છે. આથી, આ જાહેરાતો સરોગેટ પ્રમોશન હેઠળ આવે છે કે કેમ તેની ઊંડાણપૂર્વક તપાસ ચાલી રહી છે. વિભાગે કલાકારોને નોટિસ પાઠવીને ખાદ્ય સુરક્ષા કાયદાની જોગવાઈઓ હેઠળ તેમની સંડોવણી અને ભૂમિકા વિશે ખુલાસો માંગ્યો છે.

આ કાર્યવાહી પાછળ મહારાષ્ટ્ર સરકારનો તાજેતરનો કડક આદેશ મુખ્ય કારણ છે, જેમાં ૧૩ જુલાઈ ૨૦૨૬થી રાજ્યમાં પાન મસાલા જેવા હાનિકારક ઉત્પાદનોના ઉત્પાદન, સંગ્રહ અને વેચાણ પર સંપૂર્ણ પ્રતિબંધ મૂકવામાં આવ્યો છે. આ નિયમોના ભંગ બદલ કાયદાકીય જોગવાઈઓ હેઠળ રૂપિયા ૧૦ લાખ સુધીના દંડની જોગવાઈ કરવામાં આવી છે, જેને ધ્યાનમાં રાખીને એફડીએ દ્વારા આ સઘન તપાસ અભિયાન હાથ ધરવામાં આવ્યું છે.

હાલ ત્રણેય કલાકારો તરફથી આ નોટિસ અંગે કોઈ સત્તાવાર પ્રતિક્રિયા સામે આવી નથી, પરંતુ તેમના જવાબોના આધારે જ એફડીએ આગળની કાનૂની કાર્યવાહીનો નિર્ણય લેશે. આ હાઇ-પ્રોફાઇલ મામલામાં સ્ટાર્સના જવાબ પર સૌની નજર ટકેલી છે.