મુંબઈ : બોલિવૂડની ક્યુટ અને ટેલેન્ટેડ એક્ટ્રેસ શ્રદ્ધા કપૂર ફરી એકવાર બોક્સ ઓફિસ પર ધમાકો કરવા માટે તૈયાર છે. શાહિદ કપૂર, કૃતિ સેનન અને રશ્મિકા મંદન્ના અભિનીત ફિલ્મ 'કોકટેલ 2' જોવા થિયેટરોમાં પહોંચેલા દર્શકોને ત્યારે મોટો સરપ્રાઈઝ મળ્યો જ્યારે સ્ક્રીન પર શ્રદ્ધા કપૂરની આગામી મોસ્ટ અવેટેડ ફિલ્મ 'ઈથા' (Eetha) નું સત્તાવાર ટીઝર બતાવવામાં આવ્યું. જોકે, મેકર્સ દ્વારા આ ટીઝર હજુ સુધી યુટ્યુબ પર ઓફિશિયલી રિલીઝ કરવામાં આવ્યું નથી, પરંતુ થિયેટરમાંથી પ્રશંસકોએ તેને રેકોર્ડ કરીને સોશિયલ મીડિયા પર લીક કરી દીધું છે. ઇન્ટરનેટ પર આ નાનકડી ઝલક આવતાની સાથે જ સનસનાટી મચી ગઈ છે.

"નાસ્તામાં નેપો કિડ્સને ખાઈ જશે શ્રદ્ધા" - સોશિયલ મીડિયા પર ફેન્સનો દબદબો

લીક થયેલા આ ટીઝરે અત્યારથી જ સોશિયલ મીડિયા પ્લેટફોર્મ X (ટ્વિટર) પર ધૂમ મચાવી દીધી છે અને નેટીઝન્સ શ્રદ્ધાના જોરદાર વખાણ કરી રહ્યા છે. શ્રદ્ધાની શાનદાર સ્ક્રીન પ્રેઝન્સ અને મ્યુઝિક ડાયરેક્ટર અજય-અતુલના પાવરફુલ બેકગ્રાઉન્ડ મ્યુઝિક (BGM) ના સંયોજને દર્શકોના રૂવાડાં ઉભા કરી દીધા છે. એક યુઝરે શ્રદ્ધાના લુક અને કમાન્ડિંગ પર્ફોર્મન્સથી પ્રભાવિત થઈને લખ્યું, "તે માત્ર પોતાના વટ અને પર્ફોર્મન્સથી ઇન્ડસ્ટ્રીના તમામ નેપો કિડ્સને નાસ્તામાં ખાઈ શકે છે, આ શ્રદ્ધાનું પીક પર્ફોર્મન્સ છે." જ્યારે અન્ય એક યુઝરે તેને 'આઉટસ્ટેન્ડિંગ' ગણાવતા ૪.૫ સ્ટારનું રેટિંગ આપ્યું છે.

લક્ષ્મણ ઉતેકરનું ડિરેક્શન અને શક્તિશાળી સ્ટારકાસ્ટ

હાર્ડ-હટિંગ ડ્રામા અને સસ્પેન્સથી ભરપૂર આ ફિલ્મનું નિર્દેશન જાણીતા ડાયરેક્ટર લક્ષ્મણ ઉતેકર કરી રહ્યા છે, જેઓ આ પહેલા 'મીમી' અને 'છાવ' જેવી સુપરહિટ અને સંવેદનશીલ ફિલ્મો આપવા માટે જાણીતા છે. ફિલ્મ 'ઈથા' માં શ્રદ્ધા કપૂર ઉપરાંત વર્સેટાઈલ એક્ટર રણદીપ હુડા અને મોહમ્મદ ઝીશાન અયુબ પણ મુખ્ય અને મહત્વપૂર્ણ ભૂમિકામાં જોવા મળશે. ટીઝર પરથી સ્પષ્ટ દેખાય છે કે આ ફિલ્મમાં શ્રદ્ધા માત્ર કોઈ પાત્ર ભજવી નથી રહી, પરંતુ તે પોતે જ 'ઈથા' બની ગઈ છે.

૨૮ ઓગસ્ટે બોક્સ ઓફિસ પર જામશે 'મહાયુદ્ધ'

આગામી ૨૮ ઓગસ્ટ, ૨૦૨૬ ના રોજ આ ફિલ્મ સિનેમાઘરોમાં રિલીઝ થવાની છે. પરંતુ શ્રદ્ધા માટે બોક્સ ઓફિસની આ સફર આસાન નહીં હોય, કારણ કે 'ઈથા' ની સીધી ટક્કર સિદ્ધાર્થ મલ્હોત્રા અને તમન્ના ભાટિયા સ્ટારર મોટી ફિલ્મ 'વ્વાન' (Vvaan) સાથે થવાની છે. એક જ દિવસે બે મોટી ફિલ્મો રિલીઝ થવાની હોવાથી બોક્સ ઓફિસની રેસ કોણ જીતશે અને દર્શકો કોના પર વધુ પ્રેમ વરસાવશે તે જોવું ખૂબ જ રસપ્રદ રહેશે. જોકે, ટીઝરના હાઈપને જોતા અત્યારે તો પલ્લું શ્રદ્ધા કપૂરનું જ ભારે લાગી રહ્યું છે.