રાજકોટ, તા.25: બોલિવૂડની સૌથી વધુ રાહ જોવાતી કોમેડી ફ્રેન્ચાઈઝી ફિલ્મ ‘વેલકમ ટુ ધ જંગલ’નું નવું અને ધમાકેદાર ગીત ‘ઘિસ ઘિસ ઘિસ’ તાજેતરમાં રિલીઝ કરવામાં આવ્યું છે. આ ગીતે રિલીઝ થતાની સાથે જ ઇન્ટરનેટ પર આતશબાજી કરી દીધી છે. ખાસ કરીને અક્ષય કુમાર અને ભોજપુરી સિનેમાની ક્વીન અક્ષરા સિંહની જોડીએ સ્ક્રીન પર આગ લગાવી દીધી છે. ફિલ્મની સ્ટારકાસ્ટ જેટલી વિશાળ છે, તેટલી જ એનર્જી આ ગીતમાં જોવા મળી રહી છે, જે દર્શકોને ઝૂમવા માટે મજબૂર કરી દે છે.
ગીતનું મુખ્ય આકર્ષણ અક્ષય કુમારનો રસ્ટિક અને દેશી અવતાર છે. ખિલાડી કુમારે તેમના પરંપરાગત અંદાજથી દૂર જઈને જે રીતે આ ગીતમાં ડાન્સ મૂવ્સ કર્યા છે, તે ફેન્સને ખૂબ જ પસંદ આવી રહ્યા છે. અક્ષરા સિંહ સાથેની તેમની કેમિસ્ટ્રી ગીતને વધુ મનોરંજક બનાવે છે. ભવ્ય સેટ્સ અને વાયરલ થઈ શકે તેવા હૂક સ્ટેપ્સ સાથે આ ગીત આવનારા સમયમાં સોશિયલ મીડિયા રીલ્સ અને લગ્ન પ્રસંગોનું ફેવરિટ બનવા માટે સજ્જ છે.
આ હાઈ-વોલ્ટેજ ગીતને પ્રખ્યાત મ્યુઝિક કમ્પોઝર વિક્રમ મોન્ટ્રોઝ દ્વારા કમ્પોઝ કરવામાં આવ્યું છે, જેમાં તેમણે અને સુપ્રિયા પાઠકે પોતાના અવાજનો જાદુ પાથર્યો છે. અભિનવ શેખર દ્વારા લખાયેલા આ ગીતના શબ્દોમાં ‘વેલકમ’ ફ્રેન્ચાઈઝીની એ જ જૂની મસ્તી અને મનોરંજનની સુગંધ અનુભવી શકાય છે. વિક્રમ મોન્ટ્રોઝના જણાવ્યા અનુસાર, તેમનો મુખ્ય હેતુ બોલિવૂડના ગ્લેમર અને ભોજપુરી ફ્લેવરને એકસાથે લાવીને દર્શકોને એક સંપૂર્ણ મનોરંજક અનુભવ આપવાનો હતો.
આ ફિલ્મનું નિર્દેશન અહમદ ખાન કરી રહ્યા છે અને તેમાં અક્ષય કુમાર ઉપરાંત સુનીલ શેટ્ટી, દિશા પટાણી, જેકલીન ફર્નાન્ડિઝ, પરેશ રાવલ અને રાજપાલ યાદવ જેવા દિગ્ગજ કલાકારોની લાંબી યાદી છે. નિર્માતા ફિરોઝ એ. નાડિયાડવાલાની આ ફિલ્મ ૨૬ જૂન, ૨૦૨૬ના રોજ સિનેમાઘરોમાં ધૂમ મચાવવા માટે તૈયાર છે. અત્યારે તો 'ઘિસ ઘિસ ઘિસ' ગીતે પ્રેક્ષકોમાં ફિલ્મને લઈને ઉત્સુકતા વધારી દીધી છે અને મનોરંજનનો ડબલ ડોઝ આપવાની તૈયારી કરી લીધી છે.