મુંબઈ, તા.૧૯: બોલિવૂડમાં એક કહેવત છે કે દરેક સફળ પુરુષ પાછળ એક સ્ત્રીનો હાથ હોય છે, પરંતુ ફિલ્મ ઈન્ડસ્ટ્રીના ગલીયારાઓમાં આજકાલ ચર્ચા છે કે સૈફ અલી ખાનના કરિયર ગ્રાફને પાટા પર લાવવા પાછળ તેની સુપરસ્ટાર પત્ની કરીના કપૂર ખાન (બેબો) નો મગજ કામ કરી રહ્યો છે. કરીના માત્ર એક શાનદાર અભિનેત્રી, મોડેલ અને માતા તરીકેની ભૂમિકા જ નથી નિભાવી રહી, પરંતુ જ્યારે પણ તેના પતિ સૈફ અલી ખાન કરિયરમાં 'સ્ટક' એટલે કે અટવાયેલા અનુભવે છે, ત્યારે કરીના પોતાની તીક્ષ્ણ બિઝનેસ બુદ્ધિથી સૈફ માટે મુશ્કેલીનિવારક સાબિત થાય છે.

ઇન્ડસ્ટ્રીના આંતરિક સૂત્રોના જણાવ્યા અનુસાર, છેલ્લા કેટલાક સમયથી સૈફ અલી ખાનનું કરિયર થોડું શાંત રહ્યું છે. જોકે તેણે 'તાનાજી' જેવી બ્લોકબસ્ટર ફિલ્મમાં ખલનાયકની દમદાર ભૂમિકા ભજવી હતી, પરંતુ 'વિક્રમ વેધા', 'આદિપુરુષ' અને ઓટીટી પર આવેલી 'જ્વેલ થીફ' અને 'કર્તવ્ય' જેવી ફિલ્મો બોક્સ ઓફિસ કે વિવેચકો પર ખાસ જાદુ ચલાવી શકી નથી. સૈફ હાલમાં અક્ષય કુમાર સાથેની તેની આગામી મોટી ક્રાઈમ-થ્રિલર ફિલ્મ 'હૈવાન'ની રાહ જોઈ રહ્યો છે, પરંતુ આ દરમિયાન તેણે પોતાના પ્રોફેશનલ મેનેજમેન્ટમાં કેટલાક મોટા અને ચોંકાવનારા ફેરફારો કર્યા છે.

કરીનાની સલાહથી બદલાઈ એજન્સી અને સપોર્ટ સ્ટાફ

સૌથી મોટો ટ્વિસ્ટ ત્યારે આવ્યો જ્યારે સૈફે તેના લાંબા સમયના સાથી અફસર ઝૈદીની ટેલેન્ટ એજન્સી છોડીને એક મોટી હરીફ ટેલેન્ટ એજન્સી સાથે હાથ મિલાવી લીધા. બોલિવૂડના આંતરિક સૂત્રોનું જોરદાર માનવું છે કે આ આખી વ્યૂહરચના અને ઝડપી નિર્ણય પાછળ કરીના કપૂર ખાનનું તેજ મગજ કામ કરી રહ્યું હતું. કરીના સારી રીતે જાણે છે કે ફિલ્મ ઇન્ડસ્ટ્રીના બદલાતા પ્રવાહમાં સૈફને ફરીથી ટોચ પર લાવવા માટે કયા પ્રકારના પ્રોફેશનલ સપોર્ટની જરૂર છે. એજન્સી બદલવાની સાથે જ સૈફે પોતાનો આખો સપોર્ટ સ્ટાફ પણ નવો તૈયાર કર્યો છે.

આ પહેલીવાર નથી: ૨૦૧૪ માં પણ કરીના બની હતી ઢાલ

ફિલ્મ ઈન્ડસ્ટ્રીના જૂના કિસ્સાઓ યાદ કરીએ તો, વર્ષ ૨૦૧૪ માં જ્યારે સૈફ અલી ખાન અને દિનેશ વિજાનની વર્ષો જૂની ભાગીદારી તૂટી અને 'ઇલુમિનાટી ફિલ્મ્સ' અલગ થઈ, ત્યારે પણ કરીનાએ ડ્રાઇવિંગ સીટ સંભાળી હતી. તેણીએ સૈફના કરિયરને કોઈપણ નુકસાન વિના સુરક્ષિત રાખ્યું હતું, જે બાદ દિનેશે 'મેડોક ફિલ્મ્સ' બનાવી અને સૈફે પોતાની એક્ટિંગ પર ફોકસ કર્યું.

બોલિવૂડમાં માત્ર કરીના જ નહીં, પરંતુ પંકજ ત્રિપાઠી જેવા દિગ્ગજ અભિનેતાનું આખું ડેટ-શેડ્યૂલ અને ડાયરી પણ તેમની પત્ની મૃદુલા જ સંભાળે છે, જેનો સ્વીકાર ખુદ પંકજ ત્રિપાઠીએ ઘણી વાર મીડિયા સમક્ષ કર્યો છે. જો કે, કરીનાનો અંદાજ થોડો અલગ અને કોર્પોરેટ લેવલનો છે. હવે જોવાનું એ રહેશે કે 'બેગમ' કરીનાના આ માસ્ટર પ્લાન પછી નવાબ સૈફ અલી ખાન બોક્સ ઓફિસ પર કેવો ધમાકો કરે છે!