મુંબઈ: બોલિવૂડના 'બાબા' એટલે કે સંજય દત્ત ફરી એકવાર મોટા પડદા પર ધમાકેદાર વાપસી કરવા માટે તૈયાર છે. તેની આગામી ફિલ્મ 'આખરી સવાલ'નું ટ્રેલર સોશિયલ મીડિયા પર રિલીઝ કરવામાં આવ્યું છે, જેણે જોતજોતામાં ચાહકોમાં ભારે ઉત્તેજના જગાવી છે. આ ફિલ્મ ભારતીય ઈતિહાસના એવા વિવાદાસ્પદ પ્રકરણો અને મહત્વની બેઠકો પર આધારિત હોવાનું જણાય છે, જેણે દેશના ભવિષ્યની દિશા બદલી નાખી હતી. ટ્રેલર જોઈને લાગી રહ્યું છે કે આ એક પોલિટિકલ ડ્રામા હશે જે ઈતિહાસના વણઉકેલ્યા પ્રશ્નો સામે આંગળી ચીંધશે.
મૂળ યોજના મુજબ આ ફિલ્મ ૦૮ મેના રોજ રિલીઝ થવાની હતી, પરંતુ સેન્સર બોર્ડ (CBFC) સાથેની લાંબી ખેંચતાણ અને ફિલ્મના સંવેદનશીલ વિષયને કારણે હવે તેની રિલીઝ ડેટ બદલીને ૧૫ મે કરવામાં આવી છે. અહેવાલો મુજબ, સેન્સર બોર્ડ ફિલ્મના કેટલાક રાજકીય દ્રશ્યો અને ઐતિહાસિક તથ્યોને લઈને સાવચેતી વર્તી રહ્યું છે. નિર્માતાઓએ બોર્ડને સમજાવ્યું છે કે ફિલ્મ સંપૂર્ણપણે ઐતિહાસિક દસ્તાવેજો પર આધારિત છે, છતાં સર્ટિફિકેટ મેળવવામાં વિલંબ થતા રિલીઝ પાછી ઠેલવાનો નિર્ણય લેવાયો છે.
નેશનલ એવોર્ડ વિજેતા દિગ્દર્શક અભિજીત મોહન વારંગ દ્વારા નિર્દેશિત આ ફિલ્મમાં સંજય દત્ત ઉપરાંત અમિત સાધ, સમીરા રેડ્ડી અને ત્રિધા ચૌધરી જેવા કલાકારો મુખ્ય ભૂમિકામાં છે. સંજય દત્તે ઈન્સ્ટાગ્રામ પર ટ્રેલર શેર કરતા લખ્યું છે કે, "જ્યારે સત્ય દટાયેલું રહેવાનો ઇનકાર કરે ત્યારે શું થાય? જુઓ આખરી સવાલનું ટ્રેલર - જ્યાં દરેક જવાબની કિંમત ચૂકવવી પડે છે."
ફિલ્મના ટ્રેલર પર ફેન્સની પ્રતિક્રિયાઓ પણ જોરદાર આવી રહી છે. કેટલાક લોકો તેને 'બાબરી મસ્જિદ' જેવા વિવાદાસ્પદ મુદ્દાઓ સાથે જોડી રહ્યા છે, તો કેટલાક સંજય દત્તને ફરીથી પાવરફુલ રોલમાં જોવા માટે આતુર છે. હવે જોવાનું એ રહેશે કે ૧૫ મેના રોજ જ્યારે આ ફિલ્મ સિનેમાઘરોમાં આવશે, ત્યારે તે ઈતિહાસના કયા રહસ્યો પરથી પડદો ઉઠાવશે અને દર્શકોના 'આખરી સવાલ'નો શું જવાબ આપશે. સંજય દત્ત આ સિવાય 'ખલનાયક'ની સિક્વલ માટે પણ તૈયારી કરી રહ્યો હોવાના અહેવાલ છે.