મુંબઈ: હિન્દી સિનેમામાં પોતાની અનોખી હસવાની શૈલી અને લાક્ષણિક અવાજથી દાયકાઓ સુધી પ્રેક્ષકોને પેટ પકડીને હસાવનાર દિનેશ હિંગુ આજે પોતાની જિંદગીના સૌથી મુશ્કેલ તબક્કામાંથી પસાર થઈ રહ્યા છે. ૮૬ વર્ષની વયે જ્યાં લોકો આરામ કરતા હોય છે, ત્યાં આ મહાન કલાકાર આજે પોતાની સારવાર અને ડોક્ટરની ફી ચૂકવવા માટે કામ માંગી રહ્યા છે. સોશિયલ મીડિયા પર વાયરલ થયેલા તેમના એક વીડિયોએ બોલીવુડની ઝાકઝમાળ પાછળનું વરવું સત્ય ફરી એકવાર સામે લાવ્યું છે.
“બ્લેક એન્ડ વ્હાઇટ ફિલ્મોથી આજ સુધી કામ કર્યું, પણ આજે સારવારના પૈસા નથી”
દિનેશ હિંગુએ અત્યંત ભાવુક થતા જણાવ્યું કે, તાજેતરમાં તેઓ પડી જવાથી ઈજાગ્રસ્ત થયા હતા. તેમણે કહ્યું, "હું ૮૬ વર્ષનો છું અને હજુ પણ કામ કરવા તૈયાર છું. મને ડોક્ટર પાસે જવા માટે પૈસાની જરૂર છે. ડોક્ટરો ક્યારેક ૫,૦૦૦ તો ક્યારેક ૬,૦૦૦ રૂપિયા માંગે છે. અમારા જેવા સાઈડ એક્ટર્સને એટલા પૈસા મળતા નથી કે અમે બચત કરી શકીએ. મેં ગુજરાતી, રાજસ્થાની અને હિન્દી ફિલ્મોમાં વર્ષો સુધી કામ કર્યું છે, પણ આજે સ્થિતિ બદલાઈ ગઈ છે."
બોલીવુડના ‘ભૂલાયેલા’ હીરો
દિનેશ હિંગુએ ૧૯૯૦ અને ૨૦૦૦ના દાયકામાં ‘બાઝીગર’, ‘નો એન્ટ્રી’, ‘બાદશાહ’, ‘જુદાઈ’ અને ‘હેરા ફેરી’ જેવી સુપરહિટ ફિલ્મોમાં યાદગાર ભૂમિકાઓ ભજવી હતી. ૨૦૧૫ પછી તેઓ ફિલ્મોથી દૂર છે. વીડિયોમાં તેમની લાચારી જોઈને ચાહકોમાં ભારે રોષ અને દુઃખ જોવા મળી રહ્યું છે. લોકો સોશિયલ મીડિયા પર લખી રહ્યા છે કે જે કલાકારોએ આખી જિંદગી દુનિયાને હસાવવામાં વિતાવી, તેમને વૃદ્ધાવસ્થામાં આવી આર્થિક તંગીનો સામનો કરવો પડે તે બોલીવુડ માટે શરમજનક છે.
ચાહકોની મદદ માટે અપીલ
સોશિયલ મીડિયા પર આ વીડિયો વાયરલ થયા બાદ ઘણા લોકો તેમની મદદ માટે આગળ આવવા માંગે છે. એક યુઝરે લખ્યું, "આટલો મોટો કલાકાર હોવા છતાં તેમની કદર નથી થઈ, તે જોઈને હૃદય ભરાઈ આવે છે." તો અન્ય એકે લખ્યું કે બોલીવુડના મોટા સિતારાઓએ આવા પાયાના કલાકારોની મદદ માટે ટ્રસ્ટ બનાવવું જોઈએ. અત્યારે તો આ ૮૬ વર્ષનો ‘કોમેડી કિંગ’ આશાભરી નજરે કોઈ કામ કે મદદની રાહ જોઈ રહ્યો છે જેથી તે પોતાની સારવાર કરાવી શકે.