મુંબઈ:બોલિવૂડના ગલીયારામાં ભારે ચર્ચામાં રહેલી અને ૨૦૨૬ની સૌથી મહત્વાકાંક્ષી ફિલ્મ ‘રામાયણ’ પર હવે આંતરરાષ્ટ્રીય યુદ્ધના વાદળો મંડરાયા છે. રણબીર કપૂર, સાંઈ પલ્લવી અને યશ જેવા દિગ્ગજ કલાકારોને લઈને બનતી આ ફિલ્મની રાહ આખો દેશ જોઈ રહ્યો છે, પરંતુ તાજેતરના વૈશ્વિક ઘટનાક્રમે નિર્માતાઓના તમામ પ્લાનિંગ પર પાણી ફેરવી દીધું છે. રામ નવમીના પવિત્ર અવસરે ૨૬ માર્ચે મુંબઈના ગેટવે ઓફ ઈન્ડિયા ખાતે નિર્માતાઓએ ફિલ્મના કલાકારોના લુક્સ રિવિલ કરવા માટે એક ભવ્ય કાર્યક્રમનું આયોજન કર્યું હતું. પરંતુ, ઈરાન અને ઈઝરાયેલ વચ્ચેના ભીષણ યુદ્ધ અને તેના કારણે સર્જાયેલા વૈશ્વિક તણાવને ધ્યાનમાં રાખીને નિર્માતા નમિત મલ્હોત્રાએ આ ભવ્ય લોન્ચિંગને સ્થગિત કરવાનો હિંમતભર્યો નિર્ણય લીધો છે.

સૂત્રોના જણાવ્યા અનુસાર, નિર્માતાઓએ આ ઈવેન્ટ માટે તમામ તૈયારીઓ પૂર્ણ કરી લીધી હતી અને મહેમાનોને આમંત્રણો પણ પાઠવી દીધા હતા. જોકે, વર્તમાન વૈશ્વિક અસ્થિરતા વચ્ચે કોઈ પણ પ્રકારના પ્રમોશનલ કાર્યક્રમો યોજવા તે યોગ્ય સમય નથી તેમ માનીને નિર્માણ સંસ્થાએ ઉતાવળ ન કરવાનું નક્કી કર્યું છે. ફિલ્મના નિર્માતાઓ આ મેગા પ્રોજેક્ટના લોન્ચિંગને લઈને કોઈ પણ જોખમ લેવા માંગતા નથી અને ફિલ્મના પ્રોમો તથા કલાકારોના ફર્સ્ટ લુક માટે વધુ અનુકૂળ સમયની રાહ જોઈ રહ્યા છે. યુદ્ધ જેવી ગંભીર સ્થિતિમાં મનોરંજન જગતનું આટલું મોટું લોન્ચિંગ કરવું તે આર્થિક અને સામાજિક દ્રષ્ટિએ પણ યોગ્ય ન જણાતા કાર્યક્રમને મે મહિના સુધી લંબાવવામાં આવ્યો છે.

આ નિર્ણયથી ચાહકોમાં નિરાશા જરૂર છે, પરંતુ નિર્માતાઓનું માનવું છે કે રામાયણ જેવી દિવ્ય અને ભવ્ય ફિલ્મ માટે યોગ્ય વાતાવરણ હોવું અત્યંત આવશ્યક છે. ઈરાન-ઈઝરાયલ સંઘર્ષને પગલે ઊભી થયેલી અનિશ્ચિતતાએ ફરી એકવાર સાબિત કર્યું છે કે વૈશ્વિક ઘટનાઓ હવે સિનેમાના પ્રમોશનલ માર્કેટને પણ સીધી રીતે અસર કરી રહી છે. હવે જ્યારે ચાહકો રણબીર કપૂરના 'રામ' અવતારને જોવા માટે આતુર હતા, ત્યારે તેમને વધુ બે મહિનાની રાહ જોવી પડશે. હવે જોવાનું એ રહેશે કે મે મહિનામાં જ્યારે આ ભવ્ય કાર્યક્રમ યોજાશે, ત્યારે રામાયણની આ ટીમ કઈ નવી રણનીતિ સાથે દર્શકો સમક્ષ હાજર થાય છે.