નવી દિલ્હીઃ  બોલિવૂડ અભિનેત્રી પરિણીતી ચોપરા અને તેના પતિ, રાજકારણી રાઘવ ચઢ્ઢા, તેમના પહેલા બાળકના સ્વાગત માટે સંપૂર્ણ રીતે તૈયાર છે. અભિનેત્રીની ડિલિવરીનો સમય ગમે ત્યારે આવી શકે છે, તેવામાં એક મોટા સમાચાર સામે આવ્યા છે. અહેવાલો મુજબ, પરિણીતીએ ડિલિવરી માટે પોતાના સાસરિયા પક્ષને પસંદ કર્યો છે!
તાજેતરના અહેવાલો અનુસાર, પરિણીતી ચોપરા તેના પહેલા બાળકને નવી દિલ્હીમાં તેના સાસરિયાના ઘરે જન્મ આપશે. તે આ હેતુ માટે પતિ રાઘવ ચઢ્ઢા સાથે દિલ્હી પહોંચી ચૂકી છે અને પરિવાર સાથે આ અદ્ભુત ક્ષણનો આનંદ માણી રહી છે.
એક અન્ય અહેવાલમાં તો એવો પણ દાવો કરવામાં આવ્યો છે કે પરિણીતીને હોસ્પિટલમાં દાખલ કરવામાં આવી છે અને રાઘવ ચઢ્ઢા પણ તેની સાથે હાજર છે. જોકે, આ અંગેની સત્તાવાર વિગતો હજુ સુધી ઉપલબ્ધ થઈ નથી.
પોતાના વ્લોગ દ્વારા સતત ચાહકો સાથે જોડાયેલી રહેતી પરિણીતીએ તાજેતરમાં રાઘવ સાથેની પોતાની પહેલી મુલાકાત વિશે વાત કરી હતી. પરિણીતીના કહેવા મુજબ, તે બંને લંડનમાં ICC યંગ લીડર્સ ફોરમના એક નાસ્તામાં પહેલીવાર મળ્યા હતા.
પરિણીતીએ કબૂલ્યું કે માત્ર અડધો કલાક રાઘવ સાથે બેઠા પછી જ તે ખૂબ પ્રભાવિત થઈ ગઈ હતી. "મને લાગ્યું કે આ તે માણસ છે જેની સાથે હું લગ્ન કરવા માંગતી હતી." રસપ્રદ વાત એ છે કે, તેને રાઘવની ઉંમર કે વૈવાહિક સ્થિતિ વિશે કોઈ જાણ નહોતી, તેથી તેણે હોટલમાં પાછા આવીને ગૂગલ પર રાઘવને સર્ચ કર્યો અને તે પરિણીત નથી તે જાણીને રાહત અનુભવી!
પરિણીતી અને રાઘવે ૧૩ મે, ૨૦૨૩ ના રોજ દિલ્હીમાં સગાઈ કરી અને ૨૪ સપ્ટેમ્બર, ૨૦૨૩ ના રોજ ઉદયપુરમાં ભવ્ય લગ્ન કર્યા હતા. ૨૫ ઑગસ્ટ, ૨૦૨૫ ના રોજ, આ દંપતીએ ઇન્સ્ટાગ્રામ પર કેક અને ૧+૧=૩ લખેલી પોસ્ટ શેર કરીને માતા-પિતા બનવાની જાહેરાત કરી હતી.