મુંબઈ: સોનાક્ષી સિંહા અને સુધીર બાબુ અભિનીત ફિલ્મ 'જટાધારા' તેના ગ્રાન્ડ ટીઝર રિલીઝ થયા બાદથી ચર્ચામાં છે. આ ફિલ્મને એક પૌરાણિક, રહસ્યમય અને મોટા પાયે અલૌકિક-એક્શન થ્રિલર તરીકે વર્ણવવામાં આવી રહી છે, જે શ્રદ્ધા, લોભ અને પવિત્ર સ્થળોમાં છુપાયેલા રહસ્યોના ઊંડાણમાં ઉતરે છે.

ફિલ્મની વાર્તાની પૃષ્ઠભૂમિ અનંત પદ્મનાભસ્વામી મંદિરના પ્રખ્યાત કેસથી પ્રેરિત હોવાનું માનવામાં આવે છે, જે તેના છુપાયેલા ખજાના અને છઠ્ઠા રહસ્યમય દરવાજા માટે વિશ્વભરમાં જાણીતું છે.

મંદિરનું રહસ્ય: છઠ્ઠો દરવાજો
પદ્મનાભસ્વામી મંદિર લાંબા સમયથી તેના છુપાયેલા તિજોરીઓ, વિશાળ ખજાના અને તેના વહીવટને લગતા કાનૂની વિવાદોને કારણે રહસ્યનું કેન્દ્ર રહ્યું છે. મંદિરની ગાથામાં સૌથી રહસ્યમય વાર્તા છઠ્ઠા દરવાજાની છે. લોકવાયકા છે કે આ દરવાજો ખોલવાનો પ્રયાસ કરનાર વ્યક્તિનું મૃત્યુ થયું હતું, અને ત્યારબાદ કેરળમાં કુદરતી આફતો આવી હતી.

એવું માનવામાં આવે છે કે 'જટાધારા'ના નિર્માતાઓએ આ વાસ્તવિક ઘટનાઓ અને દંતકથાઓનો ઉપયોગ કરીને એક કાલ્પનિક વાર્તા બનાવી છે, જેમાં પૌરાણિક કથાઓ અને લોકવાયકાઓનું મિશ્રણ છે, જે સારા અને અનિષ્ટ વચ્ચેના સંઘર્ષનું ચિત્રણ કરે છે.

દિગ્દર્શકો વેંકટ કલ્યાણ અને અભિષેક જયસ્વાલે દર્શકોને અધિકૃતતાની અનુભૂતિ થાય તે માટે વ્યાપક સંશોધન કર્યું છે. જોકે, આ ફિલ્મ કોઈ સાચી ઘટનાઓનું સીધું ચિત્રણ નથી.

રિલીઝ અને કલાકારો
'જટાધારા' માં સુધીર બાબુ, સોનાક્ષી સિંહા, દિવ્યા ખોસલા, શિલ્પા શિરોડકર સહિતના દિગ્ગજ કલાકારો છે.

ઝી સ્ટુડિયો અને પ્રેરણા અરોરા દ્વારા પ્રસ્તુત આ ફિલ્મ 7 નવેમ્બરના રોજ હિન્દી અને તેલુગુમાં સિનેમાઘરોમાં રિલીઝ થશે.