બદલાયો બિગ બોસનો લોગો, સિઝન ૧૯નું કાઉન્ટડાઉન શરૂ
સીઝન પાંચ મહિના સુધી ચાલશે જેમાં પહેલા ત્રણ મહિના સલમાન ખાન શોનું સંચાલન કરશે અને છેલ્લા બે મહિના માટે ગેસ્ટ હોસ્ટ લાવવામાં આવશેઃ સલમાન લેશે ૧૨૦ થી ૧૫૦ કરોડ :રિયલિટી શો ‘બિગ બૉસ ૧૯' ૩૦ ઓગસ્ટથી જિયોહોટસ્ટાર પર શરૂ થઈ શકે છે
મુંબઇ તા.૨૬: સલમાન ખાનનો રિયાલિટી શો બિગ બૉસ ટૂંક સમયમાં તેની ૧૯મી સીઝન સાથે પરત ફરવા જઈ રહ્યો છે. બિગ બૉસ ૧૯ની તારીખ જાહેર કરતા પહેલા, નિર્માતાઓએ તેના લોગોમાં મોટો ફેરફાર કર્યો છે. બિગ બોસનો લોગો પાંચ વર્ષ પછી બદલાયો છે. અગાઉ, વર્ષ ૨૦૨૦ માં લોગો ડિઝાઇનમાં ફેરફાર કરવામાં આવ્યો હતો. હંમેશની જેમ, આ વખતે પણ લોગોમાં બિગ બૉસની આઇઝ છે, પરંતુ તેણે કલરફૂલ બનાવવામાં આવ્યું છે.
બિગ બૉસ ૧૯ ઓગસ્ટ ૨૦૨૫ ના અંતમાં પ્રીમિયર થવાની સંભાવના છે. અહેવાલ મુજબ, સલમાન ખાન આ વખતે પણ શોને હોસ્ટ કરશે, પરંતુ તે આખી સીઝન માટે હોસ્ટ રહેશે નહીં. સલમાન પહેલા ત્રણ મહિના માટે હોસ્ટ કરશે અને તે પછી ફરાહ ખાન, કરણ જોહર અથવા અનિલ કપૂર હોસ્ટિંગની જવાબદારી સંભાળશે. તે જ સમયે, અહેવાલ મુજબ, આ સીઝન ડિજિટલ-ફર્સ્ટ હેઠળ પહેલા OTT પ્લેટફોર્મ JioHotstar પર પ્રસારિત થશે અને તે પછી જ ટેલિવિઝન પર આવશે.
૧૯મી સીઝનની થીમ રિવાઇર્ન્ડીં હોવાનું કહેવાય છે, જેનો અર્થ એ છે કે આ શો આપણને તેના જૂના સીઝનની યાદ અપાવશે અને સિક્રેટ રૂમ જેવા પ્રખ્યાત ટ્વિસ્ટ પણ પાછા આવી શકે છે. એવું પણ કહેવામાં આવી રહ્યું છે કે આ વખતે બિગ બૉસ હાઉઝના સભ્યોને વધુ પાવર મળશે, ખાસ કરીને નોમિનેશન અને એલિમિનેશન સમયે, જે રમતને વધુ રસપ્રદ બનાવશે. આ ઉપરાંત, આ વખતે બિગ બૉસમાં AI (આર્ટિફિશિયલ ઇન્ટેલિજન્સ)નો પણ ઉપયોગ કરવામાં આવશે.
સલમાન ખાનને હોસ્ટ તરીકે ચમકાવતો રિયલિટી શો ‘બિગ બૉસ ૧૯' ૩૦ ઑગસ્ટથી જિયોહૉટસ્ટાર પર શરૂ થઈ શકે છે. આ વખતે શોમાં નવા એપિસોડ પહેલાં OTT પર આવશે અને લગભગ દોઢ કલાક પછી કલર્સ ટીવી પર બતાવવામાં આવશે. આ સીઝન પાંચ મહિના સુધી ચાલશે જેમાં પહેલા ત્રણ મહિના સલમાન ખાન શોનું સંચાલન કરશે અને છેલ્લા બે મહિના માટે ગેસ્ટ હોસ્ટ લાવવામાં આવશે. રિપોર્ટ પ્રમાણે સલમાન આ સીઝનમાં ૧૫ અઠવાડિયાં સુધી શોનું સંચાલન કરશે જેને માટે તેને દર અઠવાડિયે લગભગ ૮થી ૧૦ કરોડ રૂપિયા જેટલી ફી ચૂકવવામાં આવશે. આમ આખા શોની તેની કુલ ફી ૧૨૦થી ૧૫૦ કરોડ રૂપિયા સુધીની હોઈ શકે છે. આ પહેલાં સલમાનને ‘બિગ બૉસ ૧૮' માટે ૨૫૦ કરોડ રૂપિયા અને ‘બિગ બૉસ ૧૭' માટે ૨૦૦ કરોડ રૂપિયા મળ્યા હતા.
આ શો સાથે સંકળાયેલી વ્યક્તિએ જણાવ્યું હતું કે ‘આ શો પહેલાં OTT પર અને પછી ટીવી પર રિલીઝ થશે એથી એને OTT એક્સટેન્શન તરીકે ગણવામાં આવી રહ્યો છે. આ કારણસર સલમાનની ફી બિગ બૉસ OTT કરતાં વધુ છે, પરંતુ ટીવી-વર્ઝન જેટલી નથી. જોકે કન્ટેસ્ટન્ટનાં નામ હજી સુધી કન્ફર્મ થયાં નથી. લગભગ ૨૦ સેલેબ્સનાં નામ ચર્ચામાં છે.'(૩૮.૪)