આઇએસએસએફ શૂટિંગ વર્લ્ડકપમાં ભારતે મિક્સ ઈવેન્ટમાં ડબલ ગોલ્ડ મેડલ જીત્યા
નવી દિલ્હી: ચીનમાં ચાલી રહેલા આઇએસએસએફ શૂટિંગ વર્લ્ડકપમાં ભારતે મિક્સ ટીમ ઈવેન્ટમાં બેવડા ગોલ્ડ મેડલ જીતી લીધા હતા. ભારતની મનુ ભાકેર અને સૌરભ ચૌધરીની જોડીએ ૧૦ મીટર એર પિસ્તોલ ઈવેન્ટમાં સુવર્ણ સફળતા હાંસલ કરી હતી. જ્યારે અંજુમ મુદગીલ અને દિવ્યાંશ સિંઘ પનવરે ૧૦ મીટર એર રાઈફલ ઈવેન્ટમાં ગોલ્ડ મેડલ જીતી લીધો હતો. શૂટિંગ વર્લ્ડકપમાં હવે નવા ફોર્મેટને અમલી બનાવવામાં આવ્યું છે અને તે અંતર્ગત આ વખતે ટોચના બે સ્થાન પર રહેનારી ટીમો વચ્ચે ફાઈનલ મુકાબલો ખેલાયો હતો. ભારતના મનુ ભાકેર અને સૌરભ ચૌધરીની જોડીએ ૧૦ મીટર એર પિસ્તોલમાં ચીનના જિએંગ રાન્ક્ષીન અને પાંગ વેઈને ૧૬-૬થી પરાજય આપ્યો હતો. ભારતીય જોડી ક્વોલિફાઈંગમાં પાંચમા ક્રમે રહી હતી. જોકે ફાઈનલમાં તેમણે પ્રભુત્વસભર દેખાવ કરતાં હરિફ ટીમને તક આપી નહતી.