ક્રિકેટ વર્લ્ડકપ - 2019 : હવે 5મી જૂને ભારત પ્રથમ મેચ દક્ષિણ આફ્રિકા વિરુદ્ધ રમશે :20 મેં થી 14 જુલાઈ વચ્ચે વિશ્વકપ યુકેમાં ખેલાશે
વર્લ્ડકપ 2019માં હવે 2 જૂનના બદલે પાંચ જૂનના રોજ દક્ષિણ આફ્રિકા સામે ભારત રમશે કારણકે બીસીસીઆઈને લોઢા સમિતિની ભલામણો મુજબ આઈપીએલ અને આંતરરાષ્ટ્રીય મેચ વચ્ચે 15 દિવસનું અંતર રાખવું અનિવાર્ય છે. વિશ્વકપ આવતા વર્ષે 30મેથી 14 જુલાઈ વચ્ચે યુનાઈટેડ કિંગ્ડમમાં રમાશે. આ બાબત પર આઈસીસીના મુખ્ય અધિકારીઓ સાથે ચર્ચા થઈ હતી.
બીસીસીઆઈના એક વરિષ્ઠ અધિકારીએ જણાવ્યું કે,’આવતા વર્ષે આઈપીએલ 29 માર્ચથી 19મે વચ્ચે રમાશે. જોકે, અમારે પંદર દિવસનું અંતર રાખવું જોઈશે અને વિશ્વકપ 30મેથી શરૂ થશે. આથી 15 દિવસનું અંતર રાખવા માટે અમે પાંચ જૂનના દિવસે પહેલી મેચ રાખી શકીએ છીએ. પહેલા અમારે 2 જૂનના રોજ મેચ રાખવાની હતી પરંતુ એ શક્ય નથી.’
રસપ્રદ વાત છે કે આ પહેલા આઈસીસીની મહત્વની ટૂર્નામેન્ટની શરૂઆત ભારત-પાકિસ્તાનના મુકાબલાથી થતી હતી. કારણકે તેમાં સ્ટેડિયમ ખચાખચ ભરેલું હોય છે. વર્લ્ડકપ 2015માં ઓસ્ટ્રેલિયા (એડિલેડ) અને ચેમ્પિયન્સ ટ્રોફી 2017 (બર્મિંઘમ)માં પણ આવું જ થયું હતું. અધિકારીએ જણાવ્યું હતું કે,’આવું પહેલીવાર થશે જ્યારે ભારત-પાકિસ્તાન વચ્ચે પહેલી ટક્કર નહીં હોય.’
મંગળવારે જે અન્ય નિર્ણય લેવામાં આવ્યાં તેમાં 2019-23 માટે પાંચ વર્ માટે ફ્યૂચર ટૂર પ્રોગ્રામ (FTP)નો પણ સમાવેશ થાય છે. અધિકારીએ જણાવ્યું કે,’અમે નિર્ણય કર્યો છે કે, ભારત આ દરમિયાન દરેક ફોર્મેટમાં વધારેમાં વધારે 309 દિવસ આંતરરાષ્ટ્રિય ક્રિકેટ રમશે. જે પાંચ વર્ષના ચક્ર કરતાં 92 દિવસ ઓછું છે. જોકે, ડોમેસ્ટિક ટેસ્ટ મેચની સંખ્યા વધારીને 15થી 19 કરવામાં આવશે. આ દરેક ટેસ્ટ વિશ્વ ટેસ્ટ ચેમ્પિયનશિપનો ભાગ હશે.’
એ વાત પણ સ્પષ્ટ થઇ છે કે ભારત હજુ કોઈપણ ડે-નાઈટ ટેસ્ટ નહિ રમે. કારણકે આ મેચ વિશ્વ ટેસ્ટ ચેમ્પિયનશિપનો ભાગ નહિ હોય. અધિકારીએ જણાવ્યું કે,’આઈસીસી વિશ્વ ટેસ્ટ ચેમ્પિયનશિપના દરેક મેચ દિવસે અને લાલ બોલથી રમાશે. આવી સ્થિતિમાં ગુલાબી બોલથી ટેસ્ટ મેચ રમવાનો કોઈ જ મતલબ નથી.’