કાલથી શરૂ થશે મહિલા ટી-20 વર્લ્ડ કપ
નવી દિલ્હી: વેસ્ટ ઈન્ડિઝની ભૂમિ પર તારીખ ૯મી નવેમ્બર ને શુક્રવારથી પાંચમા વિમેન્સ ટી-૨૦ વર્લ્ડ કપનો પ્રારંભ થશે. ક્રિકેટ વિશ્વની ટોચની ૧૦ ટીમો વચ્ચેના આ મેગા મુકાબલામાં ટ્વેન્ટી-૨૦ વર્લ્ડ ચેમ્પિયન બનવા માટે રસાકસીભર્યો જંગ જામશે. હરમનપ્રીત કૌરની આગેવાની હેઠળની ભારતની મહિલા ટીમ પ્રથમ વખત ટ્વેન્ટી-૨૦ વર્લ્ડ કપ જીતવા માટેના દાવેદારોમાં સામેલ છે. જ્યારે આઇસીસી વિમેન્સ ટ્વેન્ટી-૨૦ રેન્કિંગમાં ટોચનું સ્થાન ધરાવતા ઓસ્ટ્રેલિયાની સાથે સાથે ઈંગ્લેન્ડ અને ન્યુઝીલેન્ડની ટીમો પણ ટ્વેન્ટી-૨૦ વર્લ્ડ કપમાં હેવિવેઈટ્સ તરીકે ઉતરશે.ડિફેન્ડિંગ ચેમ્પિયન વેસ્ટ ઈન્ડિઝ ઘરઆંગણે ખેલાઈ રહેલા ટ્વેન્ટી-૨૦ વર્લ્ડ કપમાં ડાર્ક હોર્સ મનાય છે. ભારતીય સમય પ્રમાણે તારીખ ૯મી નવેમ્બર ને શુક્રવારે રાત્રે ૮.૩૦ વાગ્યાથી ભારત અને ન્યુઝીલેન્ડની મહિલા ટીમો વચ્ચે સૌપ્રથમ મુકાબલો ખેલાશે. આ ઉપરાંત ૯મીએ જ મધરાત બાદ ૧.૩૦ વાગ્યાથી ઓસ્ટ્રેલિયા અને પાકિસ્તાન વચ્ચે જંગ જામશે. જ્યારે પરોઢે ૫.૩૦ વાગ્યે (૧૦ નવેમ્બરને શનિવારે) વેસ્ટ ઈન્ડિઝ અને બાંગ્લાદેશની ટીમો વચ્ચે મુકાબલો શરૃ થશે.