ઓસ્ટ્રેલિયન ઓપન: સેરેના ત્રીજા રાઉન્ડમાં પહોંચી

યુએસની દિગ્ગજ મહિલા ટેનિસ ખેલાડી સેરેના વિલિયમ્સે વર્ષના પ્રથમ ગ્રાન્ડ સ્લેમ ઓસ્ટ્રેલિયન ઓપન ટેનિસ ટૂર્નામેન્ટના ત્રીજા રાઉન્ડમાં સ્થાન મેળવ્યું છે. 10 મા ક્રમાંકિત સેરેનાએ મહિલા સિંગલ્સના બીજા રાઉન્ડમાં સર્બિયાની નીના સ્ટોઝોનોવિચને 6-3, 6-0થી હરાવી. આઠ વખત ઓસ્ટ્રેલિયન ઓપન જીતનાર સેરેનાએ એક કલાક અને છ મિનિટમાં મેચ જીતી લીધી હતી.તેના 24 મા ગ્રાન્ડસ્લેમ ખિતાબની શોધમાં રહેલી સેરેના 20 મી વખત ટૂર્નામેન્ટમાં ભાગ લઈ રહી છે અને આમાંથી તે 19 મી વખત ત્રીજા રાઉન્ડમાં પહોંચી છે.39 વર્ષીય સેરેનાએ આ ટૂર્નામેન્ટના ઇતિહાસમાં કોઈ પણ મહિલા ખેલાડી કરતા વધારે મેચ રમી છે. તે અત્યાર સુધી ઓસ્ટ્રેલિયન ઓપનમાં 89 મેચ જીતી ચૂકી છે, જ્યારે 12 હારી ગઈ છે. તેણે તેના પ્રથમ રાઉન્ડમાં જ જર્મનીના લ્યુએરા સિગ્મંડને હરાવ્યો, જે આ ટૂર્નામેન્ટમાં તેની 100 મી મેચ હતી. સેરેના હવે ત્રીજા રાઉન્ડમાં એનાસ્તાસિયા પોટાપોવા સામે ટકરાશે.