રાજકોટની પ્રિયાંશીએ નેપાળમાં રમાયેલ એશિયન ટેનીશ ચેમ્પીયનશીપમાં ડંકો વગાડયોઃ ગોલ્ડ-સીલ્વર મેડલ...
રાજય સરકારે ગુજરાતનું નામ ગૌરવ કરનાર આ દિકરીને લાખેણું ઇનામ જાહેર કરવુ જોઇએ...: સીંગલમાં રનર્સઅપઃ ડબલ્સમાં ચેમ્પીયનઃ માતા-પિતા-કોચ ભાવવિભોર...
રાજકોટ તા. ૬ :.. તાજેતરમાં સ્ટેટ ખેલ મહાકુંભમાં અમદાવાદમાં જબરદસ્ત રમત દાખવી રાજકોટ-સૌરાષ્ટ્ર-કચ્છનંુ નામ રોશન કરનાર પ્રિયાંશી ગીરીશભાઇ ચૌહાણે અન્ડર-૧૪ ની નેપાળમાં રમાયેલી એશીયન ટેનીશ ચેમ્પીયનશીપમાં જબરો ડંકો વગાડી સમગ્ર દેશમાં ગુજરાતનું નામ સુવર્ણ અક્ષરે લખી નાખ્યું છે, નાનકડી પ્રિયા ઉપર ચારેબાજૂથી અભિનંદન વર્ષા વરસી રહી છે, દેશમાંથી બે જ દિકરી સિલેકટ થઇ હતી તેમાંથી એક રાજકોટની રામકૃષ્ણનગર-૧, ધર્મરાજ એપાર્ટમેન્ટમાં રહેતા ગીરીશભાઇ ચૌહાણ તથા કાજલ ચૌહાણની આ પનોતી પુત્રીએ ટેનીશમાં જબરી રમત દાખવી એક ગોલ્ડ અને એક સિલ્વર એમ બે મેડલ હાંસલ કરી નેપાળને દંગ કરી દિધુ હતું.
શહેરની પ્રિયાંશી ચૌહાણે આંતરરાષ્ટ્રીય ટેનિસ ચેમ્પીયનશીપમાં પણ ડંકો વગાડી ગોલ્ડ, સીલ્વર મેડલ મેળવ્યો છે.
નેપાળમાં જ એશિયન ટેનિસ ફેડરેશન દ્વારા અન્ડર-૧૪ ચેમ્પીયનશીપ યોજાઇ હતી. જેમાં શહેરની પ્રિયાંશીએ ડબલ્સ અને સીંગલ્સમાં ભાગ લીધો હતો. ડબલ્સમાં શુભાંગી શાહ સાથે રમી પ્રિયાંશીએ પ્રતિસ્પર્ધી મીલી ચૂંગ-અઝા રેગ્મીને ૬-ર, ૭-પ થી હરાવીને ગોલ્ડ મેડલ મેળવ્યો હતો. જયારે સિંગલ્સ ઇવેન્ટમાં યજમાન નેપાળની શ્રવાની શ્રેષ્ઠા સામે ફાઇનલમાં ર-૬, ર-૭ થી પરાજયનો સામનો કરવો પડતા સીલ્વર મેડલથી મન મનાવવું પડયું હતું. કોચ કુલદીપ જોષી પાસે તાલીમ લેતી પ્રિયાંશીની સિધ્ધિ બદલ શાળા સંચાલકે અભિનંદન પાઠવ્યા હતાં.
પ્રિયાંશીએ આ સિધ્ધી મેળવી ત્યારે પિતા આઇસીઆઇસીઆઇ બેંકના ઓફીસર ગીરીશ ચૌહાણ હાજર હતાં. બંને માતા-પિતા ભાવવિભોર બની ગયા હતાં, કોચ કુલદીપ જોષી પણ આનંદથી ઝૂમી ઉઠયા હતાં.
ગુજરાતનો ડંકો વગાડનાર પ્રિયાંશીને આ બે મેડલ બદલ ગુજરાત સરકારે ખાસ સ્પેશીયલ લાખેણું ઇનામ જાહેર કરવું તેમ ચાહક વર્ગની માંગણી ઉઠી છે. (પ-૧૭)