શ્રીલંકા વન ડે ટીમના કેપ્ટન તરીકે થિસારા પરેરાની હકાલપટ્ટી

નવી દિલ્હી: શ્રીલંકાની વન ડે ટીમના કેપ્ટન તરીકે થિસારા પરેરાની હકાલપટ્ટી કરી દેવામાં આવી છે. થિસારાને નવેમ્બરમાં જ વન ડે ટીમનુ સુકાન સોંપવામાં આવ્યું હતુ અને માત્ર બે જ મહિનામાં તેને પાકિસ્તાન સામે અને ત્યાર બાદ ભારત પ્રવાસમાં ટીમની ઘોર નિષ્ફળતા બાદ કેપ્ટન તરીકે પડતો મૂકવામાં આવ્યો છે. શ્રીલંકાએ જાહેરાત કરી છે કે , તેઓ કેપ્ટન તરીકે ફરી એંજેલો મેથ્યૂસ કે ચાંદીમલને જવાબદારી સોંપવાનું વિચારી રહ્યા છે. છેલ્લા કેટલાક સમયથી શ્રીલંકાના ક્રિકેટની નાલેશીભરી પડતી થઈ છે. ગત વર્ષે જ ઝિમ્બાબ્વે સામે શ્રેણી ગુમાવ્યા બાદ શ્રીલંકાના કેપ્ટન તરીકે મેથ્યૂસે રાજીનામું આપી દીધું હતુ. આ પછી શ્રીલંકાના ક્રિકેટ બોર્ડે ચાંદીમલને ટેસ્ટનો અને થારંગાને મર્યાદિત ઓવરોના ક્રિકેટમાં કેપ્ટન તરીકેની જવાબદારી સોંપવામાં આવી હતી. જોકે વન ડે અને ટી-૨૦માં શ્રીલંકાનો દેખાવ નાલેશીભર્યો રહ્યો હતો. આ કારણે થારંગાને પડતો મૂકીને આ જવાબદારી થિસારા પરેરાને સોંપવામાં આવી હતી. પરેરા પણ નિષ્ફળ જતાં ફરી શ્રીલંકન ક્રિકેટે મેથ્યૂસ-ચાંદીમલ તરફ મીટ માંડી છે.