Gujarati News

Gujarati News

News of Friday, 31st July 2020

ક્રિકેટર શ્રીસંતના હોટલના રૂમમાં છોકરીઓ રહેતી હતી

આઇપીએલમાં શ્રીસંત સાથે રમેલા હરમિતનો ઘટસ્ફોટ : વર્ષ ૨૦૧૩માં શ્રીસંતની ધરપકડના ફૂટેજ જોયા તો તેમાં કેટલીક છોકરીઓ તેના રૂમમાં જતી જોવા મળી હતી

નવી દિલ્હી, તા. ૩૧ : આઇપીએલની ૨૦૧૩ની સિઝન દરમિયાન ઝડપી બોલર શ્રીસંત સામે મેચ ફિક્સિંગના આરોપો લાગ્યા હતા. તેને જેલમાં જવું પડ્યું હતું. રાજસ્થાન રોયલ્સના ત્રણ ખેલાડી શ્રીસંત, અંકિત ચવાણ અને અજિત ચંદેલાને દિલ્હી પોલીસે ધરપકડ કરીને જેલમાં મોકલી આપ્યા હતા. જોકે હવે શ્રીસંતનો પ્રતિબંધ પૂરો થયો છે અને તે આવતા મહિનાથી મેદાન પર પુનરાગમન કરનારો છે ત્યારે રાજસ્થાન રોયલ્સના ભૂતપૂર્વ સ્પિનર અને ૨૦૧૨માં ભારતને અંડર-૧૯ વર્લ્ડ કપમાં સફળતા અપાવનારા સ્પિનર હરમિતસિંહે ઘટસ્ફોટ કર્યો છે.

હરમિતે જણાવ્યું હતું કે તે રાજસ્થાન રોયલ્સની ટીમમાં રમતો હતો ત્યારે શ્રીસંતની નજીક હતો. શ્રીસંત તેને હંમેશાં સાથે રાખતો હતો. તેનો રૂમ પણ શ્રીસંતની નજીકમાં જ રહેતો હતો. શ્રીસંત આખી રાત પાર્ટી કરતો હતો અને તેના રૂમમાં છોકરીઓ રહેતી હતી. એ વખતે અમારી ટીમમાં માત્ર બે જ ટેસ્ટ ક્રિકેટર હતા શ્રીસંત અને રાહુલ દ્રવિડ. આ બંનેનો તમામ આદર કરતા હતા. શ્રીસંત મને તેની નજીકના રૂમમાં રાખતો હતો જેથી અન્ય ખેલાડી પરેશાન થાય નહીં.

૨૦૧૩માં શ્રીસંતની ધરપકડના ફૂટેજ જોયા તો તેમાં કેટલીક છોકરીઓ તેના રૂમમાં જતી જોવા મળી હતી. હરમિતે આ અંગે જણાવ્યું હતું કે તેના રૂમમાં કોણ આવતું હતું તેની સાથે મારે કોઈ લેવા દેવા ન હતી પરંતુ હું વહેલો ઉઠીને સવારે ૬.૦૦ વાગ્યે જિમમાં જતો હતો ત્યારે તેના રૂમમાં પાર્ટી ચાલતી રહેતી હતી. મને એટલે શંકા ગઈ નહીં કેમ કે જે જીજુ જનાર્દન પકડાયો હતો તેણે કહ્યું હતું કે તે શ્રીસંતનો ભાઈ છે. આવામાં કોણ શંકા કરે. તે શ્રીસંતની સાથે જ રહેતો હતો અને તેની સાથે છોકરીઓ રહેતી હતી.

હરમિતે એમ પણ ખુલાસો કર્યો કે શ્રીસંતના રૂમનું બિલ બેથી ત્રણ લાખ રૂપિયા આવતું હતું. જ્યારે પણ અમે હોટેલમાં બેથી ત્રણ દિવસ રોકાતા ત્યારે તેન રૂમ સર્વિસનું બિલ જ બે કે ત્રણ લાખમાં આવતું હતું. તે લોકોને શરાબ ગિફ્ટમાં આપતો હતો. અમને લાગતું કે તે બે વાર વર્લ્ડ કપ વિજેતા ટીમમાં રમ્યો છે અને આઇપીએલમાં રમે છે. આમ અમને ક્યારેય મેચ ફિક્સિંગ અંગે શંકા આવી ન હતી.

(9:53 pm IST)