Gujarati News

ટીમ ઇન્ડિયાના ભૂતપૂર્વ કૅપ્ટન અને હાલમાં અન્ડર-૧૯ ટીમના કોચ રાહુલ દ્રવિડનું કહેવું છે કે આપણા દેશમાં ઑલરાઉન્ડર ફાસ્ટ બોલરો હંમેશાં ડિમાન્ડમાં રહેશે. હાર્દિક પંડ્યા આનું શ્રેષ્ઠ ઉદાહરણ છે. 

અન્ડર-૧૯ ટીમ ન્યુ ઝીલૅન્ડમાં વર્લ્ડ કપ રમવા જઈ રહી છે એની પત્રકાર-પરિષદમાં હાર્દિક પંડ્યા વિશે બોલતાં રાહુલ દ્રાવિડે કહ્યું હતું કે ‘તેણે ફટાફટ ભારતીય વન-ડે અને વ્૨૦ ટીમમાં પ્રવેશ મેળવી લીધો છે, કારણ કે તેણે ટીમને શું જોઈએ છે એ જાણી લીધું અને એ રીતે પોતાની જાતને ઢાળી દીધી. ભારતમાં સ્પિનરો છે પણ ઑલરાઉન્ડર હોય એવા કેટલા? ફાસ્ટ બોલર હોય અને તે સારો બૅટ્સમૅન હોય એવા કેટલા? આમ હાર્દિક પંડ્યાએ ટીમને ક્યારે શું જોઈએ એ જાણીને એ રીતની રમત દાખવી છે.’હાર્દિક પંડ્યાએ ૨૦૧૫માં  IPLમાં રમવાનું શરૂ કર્યું અને ૨૦૧૬માં તેને વ્૨૦માં લેવામાં આવ્યો. ત્યાર બાદ તરત તેણે વન-ડેમાં પણ ડેબ્યુ કર્યું અને ૨૦૧૭માં તેને ટેસ્ટ-ટીમમાં લઈ લેવામાં આવ્યો. આ વિશે બોલતાં રાહુલ દ્રવિડે કહ્યું કે ‘હાર્દિક આજે જ્યાં પહોંચ્યો છે એ તે પોતાના બળે અને પોતાના પર્ફોર્મન્સને કારણે. આજે ટીમને એવા ફાસ્ટ બોલરોની જરૂર છે જે ઑલરાઉન્ડર પણ હોય. આવા ક્રિકેટરોની સંખ્યા આંગળીના વેઢે ગણાય એટલી છે.’