Gujarati News

મુંબઈની પ્રતિષ્ઠિત સ્કૂલ ટૂર્નામેન્ટ હેરિસ શીલ્ડની પ્રથમ રાઉન્ડની નોક આઉટ મેચમાં આ અજીબ ઘટના બની છે. ચિલ્ડ્રન્સ વેલ્ફેર સ્કૂલ શક્ય તેટલી વહેલી તકે ભૂલી જવા માંગે તેવી આ ઘટના છે. અંધેરીની આ શાળા બોરીવલીની સ્વામી વિવેકાનંદ ઇન્ટરનેશનલ સ્કૂલ સામેની મેચ હારી ગઈ હતી, પરંતુ તેની એક વિચિત્ર વાત એ હતી કે તેના તમામ બેટ્સમેન શૂન્ય પર આઉટ થયા હતા. હા આ સાંચી વાત છે, તેનો કોઈ પણ બેટ્સમેન ખાતુ પણ ખોલી શક્યો નહતો.

અહી આ ટીમ માટે સારી વાત એ રહી કે વિરોધી ટીમનાં બોલરોએ 7 વધારાનાં રન (છ વાઇડ અને એક બાય) આપી દીધા, જો તે ન હોત, તો સ્કોરબોર્ડ પર કોઈ રન ન હોત. ચિલ્ડ્રન વેલફેરની આખી ટીમ માત્ર છ ઓવરમાં ઓલઆઉટ થઈ ગઈ હતી. વિવેકાનંદ ઇન્ટરનેશનલ સ્કૂલ માટે મધ્યમ ઝડપી બોલર આલોક પાલે ત્રણ ઓવરમાં ત્રણ રન આપી 6 વિકેટ ઝડપી હતી. કેપ્ટન વરોદ વાજે ત્રણ રનમાં બે વિકેટ ઝડપી હતી. જ્યારે બાકીનાં બે બેટ્સમેન રન આઉટ થયા હતા. આ શરમજનક પ્રદર્શનને કારણે ચિલ્ડ્રન વેલ્ફેર ટીમ 754 રનનાં વિશાળ અંતરથી મેચ હારી ગઈ. પરંપરાગત ઈન્ટરસ્કૂલ ટૂર્નામેન્ટમાં આ કદાચ સૌથી મોટી હાર હશે. આઝાદ મેદાનનાં નવા એરા ગ્રાઉન્ડ પર પ્રથમ બેટિંગ કરતા વિવેકાનંદ સ્કૂલે મીટ માયેકરની ત્રેવડી સદી (અણનમ 338, 134 બોલમાં, 56 ચોક્કા અને સાત છક્કા) ની મદદથી 39 ઓવરમાં 761 રન બનાવ્યા હતા.

ચિલ્ડ્રન વેલફેરનાં બોલરો નિર્ધારિત 3 કલાકમાં 45 ઓવર પૂર્ણ કરવામાં નિષ્ફળ જતા આ સ્કોરમાં 156 રનનો દંડ પણ શામેલ હતો. તેણે છ ઓવર ઓછી ફેંકી. કૃષ્ણા પાર્તે (95) અને ઇશાન રોયે (67) રન બનાવ્યા. સ્વામી વિવેકાનંદ ઇન્ટરનેશનલ સ્કૂલનાં કોચ મહેશ લોતીકર આ જીતથી ખૂબ જ ખુશ દેખાયા હતા. આશ્ચર્યજનક બાબત એ છે કે ટીમના કેપ્ટન આયુષ જેઠવા અને અન્ય બે ખેલાડીઓ મુંબઇ અંડર -16 કેમ્પમાં હોવાને કારણે આ મેચમાં રમ્યા ન હતા. ભારતીય ટીમનો સુપરસ્ટાર બેટ્સમેન રોહિત શર્મા, જે સ્કૂલનો પૂર્વ વિદ્યાર્થી હતો, જો તે સ્કોરકાર્ડ જોશે તો ખૂબ આનંદ કરશે. બુધવાર સ્વામી વિવેકાનંદ શાળા માટે ખરેખર યોગ્ય દિવસ રહ્યો હતો.