Gujarati News

નવી દિલ્હીઃ ભારતીય મહિલા ટીમે ટી20 વિશ્વકપમાં વિજય અભિયાન જાળવી રાખતા ગ્રુપ સ્ટેજના અંતિમ મેચમાં મજબૂત ઓસ્ટ્રેલિયાની ટીમને 48 રને પરાજય આપ્યો હતો. આ વિજય સાથે ભારતની ટીમ પોઈન્ટ ટેબલમાં પ્રથમ સ્થાને પહોંચી ગઈ છે. બંન્ને ટીમોએ સેમીફાઇનલમાં પ્રવેશ કરી લીધો હોવાને કારણે આ મેચ માત્ર ઔપચારિકતા જ હતો

 . ટોસ જીતીને પ્રથમ બેટિંગ કરતા ભારતે 8 વિકેટના ભોગે 167 રન બનાવ્યા હતા. જેના જવાબમાં ઓસ્ટ્રેલિયાની ટીમ 19.4 ઓવરમાં 119 રન બનાવી ઓલઆઉટ થઈ ગઈ હતી. ભારત તરફથી 83 રન ફટકારનાર સ્મૃતિ મંધાનાને મેન ઓફ ધ મેચનો એવોર્ડ આપવામાં આવ્યો હતો. 

  ભારત તરફથી અનુજા પાટિલે 15 રન આપીને ત્રણ વિકેટ ઝડપી હતી. આ સિવાય દીપ્તિ શર્મા, રાધા યાદવ અને પૂનમ યાદવને બે-બે સફળતા મળી હતી. 

  ઓસ્ટ્રેલિયન ટીમને દીપ્તિ શર્માએ ઈનિંગની પાંચમી ઓવરમાં સતત બે ઝટકા આપ્યા. આ ઓવરના પ્રથમ બોલ પર  એલિસ વિલાની (6)નો કેચ વેદા કૃષ્ણામૂર્તિએ ઝડપ્યો હતો. તેના પછીના બોલ પર બેથ મૂની (19)ને બોલ્ડ કરી  ઓસ્ટ્રેલિયાનો સ્કોર 2 વિકેટ પર 27 રન થઈ ગયો હતો. કેપ્ટન મેગ લેનિંગ (10) રાધા યાદવનો શિકાર બની હતી.  ત્યારબાદ પૂનમ યાદવે એશલેઘ ગાર્ડનર (20)ને આઉટ કરી હતી.