Gujarati News

Gujarati News

News of Saturday, 17th October 2020

ડી વિલિયર્સની વિસ્ફોટક બેટિંગ : રાજસ્થાન લાચાર

આઈપીએલ-૧૩મી સિઝનની ૩૩મી મેચ : બેંગલોરે રાજસ્થાન સામે આસાનીથી સાત વિકેટે વિજય મેળવ્યો, વિલિયર્સે ૨૨ બોલમાં અણનમ ૫૫ રન ફટકાર્યા

દુબઈ,તા.૧૭ : એબી ડી વિલિયર્સની વિસ્ફોટક અડધી સદી તથા કેપ્ટન વિરાટ કોહલીની આક્રમક બેટિંગની મદદથી રોયલ ચેલેન્જર્સ બેંગલોરે શનિવારે રમાયેલી મેચમાં રાજસ્થાન રોયલ્સ સામે સાત વિકેટે આસાન વિજય નોંધાવ્યો છે. આઈપીએલ ટી૨૦ ક્રિકેટ ટુર્નામેન્ટની ૧૩મી સિઝનમાં શનિવારે દુબઈ ખાતે રમાયેલી મેચમાં રાજસ્થાને પ્રથમ બેટિંગ કરતા બેંગલોર સામે ૧૭૮ રનનો લક્ષ્યાંક મૂક્યો હતો. જેને બેંગલોરે ૧૯.૪ ઓવરમાં ત્રણ વિકેટે ૧૭૯ રન નોંધાવીને મેચ જીતી લીધી હતી. ડી વિલિયર્સે ૨૨ બોલમાં અણનમ ૫૫ રનની ધમાકેદાર ઈનિંગ્સ રમી હતી. અગાઉ કેપ્ટન સ્ટિવ સ્મિથની અડધી સદીની મદદથી રાજસ્થાન રોયલ્સે ૨૦ ઓવરમાં છ વિકેટે ૧૭૭ રનનો સ્કોર નોંધાવ્યો હતો. આ વિજય સાથે રોયલ ચેલેન્જર્સ બેંગલોર ૧૨ પોઈન્ટ સાથે ત્રીજા ક્રમે છે. જ્યારે રાજસ્થાન છ પોઈન્ટ સાથે સાતમાં ક્રમે પહોંચી ગયું છે.

૧૭૮ રનના લક્ષ્યાંકના જવાબમાં દેવદત્ત પડિક્કલ અને એરોન ફિંચની ઓપનિંગ જોડી બેટિંગમાં આવી હતી. જોકે, ફિંચ ૧૧ બોલમાં બે સિક્સર સાથે ૧૪ રન નોંધાવીને આઉટ થઈ ગયો હતો. ત્યારબાદ પડિક્કલે કેપ્ટન વિરાટ કોહલી સાથે મળીને રનગતિ ઝડપી બનાવી દીધી હતી. બંને બેટ્સમેનોએ શાનદાર બેટિંગ કરી હતી. આ જોડીએ ૭૯ રનની ભાગીદારી નોંધાવી હતી. જોકે, ટીમનો સ્કોર ૧૦૨ રન થયો હતો ત્યારે બંને બેટ્સમેનો આઉટ થઈ ગયા હતા. દેવદત્તે ૩૭ બોલમાં બે ચોગ્ગા સાથે ૩૫ રન નોંધાવ્યા હતા. જ્યારે કોહલીએ ૩૨ બોલમાં એક ચોગ્ગા અને બે સિક્સર સાથે ૪૩ રનની ઈનિંગ્સ રમી હતી.

કોહલી અને દેવદત્ત આઉટ થયા બાદ એબી ડી વિલિયર્સે ઝંઝાવાતી બેટિંગ કરીને બેંગલોરનો વિજય અસાન બનાવી દીધો હતો. બેંગલોરની બેટિંગનું મુખ્ય આકર્ષણ ડી વિલિયર્સની તોફાની બેટિંગ રહી હતી. તેણે ૨૨ બોલમાં અણનમ ૫૫ રન ફટકાર્યા હતા. જેમાં એક ચોગ્ગો અને છ સિક્સર સામેલ હતી. આ ઉપરાંત ગુરકીરાટ સિંહ માને ૧૭ બોલમાં અણનમ ૧૯ રનનું યોગદાન આપ્યું હતું. ડી વિલિયર્સના ઝંઝાવાત સામે રાજસ્થાનના બોલર્સ લાચાર બની ગયા હતા. રાજસ્થાન માટે શ્રેયસ ગોપાલ, કાર્તિક ત્યાગી અને રાહુલ તેવાટિયાએ એક-એક વિકેટ ઝડપી હતી.

અગાઉ કેપ્ટન સ્ટિવ સ્મિથની આક્રમક અડધી સદી તથા ઓપનર રોબિન ઉથપ્પાએ રમેલા તાબડતોબ ઈનિંગ્સની મદદથી રાજસ્થાન રોયલ્સે રોયલ ચેલેન્જર્સ બેંગલોર વિરુદ્ધ ૧૭૮ રનનો લક્ષ્યાંક મૂક્યો હતો. આઈપીએલ ટી૨૦ ક્રિકેટ ટુર્નામેન્ટની ૧૩મી સિઝનમાં દુબઈમાં રમાયેલી ૩૩મી મેચમાં રાજસ્થાને ટોસ જીતીને પ્રથમ બેટિંગ કરવાનો નિર્ણય કર્યો હતો. રાજસ્થાને શાનદાર બેટિંગ પ્રદર્શન કરતા નિર્ધારીત ૨૦ ઓવરમાં છ વિકેટે ૧૭૭ રનનો સ્કોર નોંધાવ્યો છે. સ્ટિવ સ્મિથે ૫૭ રનની ઈનિંગ્સ રમી હતી.

ટોસ જીતીને પ્રથમ બેટિંગ કરવા ઉતરેલી રાજસ્થાન ટીમને રોબિન ઉથપ્પાએ આક્રમક શરૂઆત અપાવી હતી. બેન સ્ટોક્સ અને રોબિન ઉથપ્પાની જોડી ઓપનિંગમાં આવી હતી. જેમાં ઉથપ્પાએ બેંગલોરના બોલર્સની ધોલાઈ કરી હતી. સ્ટોક્સ ૧૯ બોલમાં બે ચોગ્ગા સાથે ૧૫ રન નોંધાવીને આઉટ થયો હતો. જ્યારે ઉથપ્પાએ ૨૨ બોલમાં ૪૧ રન ફટકાર્યા હતા. જેમાં તેણે સાત ચોગ્ગા અને એક સિક્સર ફટકારી હતી. રાજસ્થાને સારી શરૂઆત બાદ ટીમે ઉપરા-ઉપરી વિકેટો ગુમાવી હતી. સંજૂ સેમસન છ બોલમાં નવ રન નોંધાવીને આઉટ થયો હતો.

બાદમાં કેપ્ટન સ્ટિવ સ્મિથે આક્રમક અડધી સદી ફટકારી હતી. જેમાં તેને જોસ બટલર અને રાહુલ તેવાટિયાનો યોગ્ય સહકાર સાંપડ્યો હતો. સ્મિથની આક્રમક અડધી સદીની મદદથી જ રાજસ્થાન મોટો સ્કોર નોંધાવવામાં સફળ રહ્યું હતું. સ્મિથે ૩૬ બોલમાં છ ચોગ્ગા અને એક સિક્સર સાથે ૫૭ રન ફટકાર્યા હતા. જ્યારે બટલરે ૨૫ બોલમાં ૨૪ રનનું યોગદાન આપ્યું હતું. તેવાટિયા ૧૯ રન નોંધાવીને અણનમ રહ્યો હતો. રોયલ ચેલેન્જર્સ બેંગલોર માટે ક્રિસ મોરિસે ચાર તથા યુઝવેન્દ્ર ચહલે બે વિકેટ ઝડપી હતી.

(9:16 pm IST)