Gujarati News

નવી દિલ્‍હી, તા.૧૬: વિશ્વ ફૂટબોલ સંચાલક મંડળ FIFA એ ભારતીય ફૂટબોલ ફેડરેશન (AIFF) ને તૃતીય પક્ષની દખલગીરીને કારણે તાત્‍કાલિક અસરથી સસ્‍પેન્‍ડ કરી દીધું છે. ફિફાના નિયમોના ગંભીર ઉલ્લંઘનને કારણે આ નિર્ણય લેવામાં આવ્‍યો છે. બીજી તરફ કોલકાતામાં ૧૬ ઓગસ્‍ટ મંગળવારથી ડ્‍યુરન્‍ડ કપ શરૂ થવા જઈ રહ્યો છે. બેંગ્‍લોર એફસી બીજા દિવસે જમશેદપુર એફસી સામે ટકરાશે. ટૂર્નામેન્‍ટમાં ૧૧ ઈન્‍ડિયન સુપર લીગ (ISL) ક્‍લબ ભાગ લેશે.
માહિતી અનુસાર, આ મહિનાની શરૂઆતમાં, વિશ્વ ફૂટબોલ સંચાલક સંસ્‍થા FIFA એ ત્રીજા પક્ષની દખલગીરીને કારણે ફૂટબોલ ફેડરેશન ઓફ ઈન્‍ડિયા (AIFF) ને સસ્‍પેન્‍ડ કરવાની ધમકી આપી હતી. આ સાથે ફિફાએ ઓક્‍ટોબરમાં યોજાનાર મહિલા અંડર-૧૭ વર્લ્‍ડ કપની યજમાનીનો અધિકાર છીનવી લેવાની ધમકી પણ આપી હતી. સુપ્રીમ કોર્ટે AIFFની ચૂંટણી યોજવાના નિર્દેશ આપ્‍યાના થોડા દિવસો બાદ આ ચેતવણી આવી છે. જો કે, સુપ્રીમ કોર્ટ દ્વારા નિયુક્‍ત કમિટી ઓફ એડમિનિસ્‍ટ્રેટર્સ (CoA) એ ચૂંટણી પ્રક્રિયા શરૂ કરી દીધી છે. ૨૮ ઓગસ્‍ટે ચૂંટણી યોજાવાની છે.
અહીં, ભારતીય ફૂટબોલ કેપ્‍ટન અને અનુભવી સ્‍ટ્રાઈકર સુનિલ છેત્રીએ રવિવારે તેના સાથી ખેલાડીઓને કહ્યું કે ભારતીય ફૂટબોલને સ્‍થગિત કરવા અથવા પ્રતિબંધિત કરવાની ફિફાની ધમકીઓ પર ધ્‍યાન આપવાની જરૂર નથી. તેણે ખેલાડીઓને કહ્યું કે તમારે મેદાન પર તમારું સર્વશ્રેષ્ઠ પ્રદર્શન કરવા પર ધ્‍યાન કેન્‍દ્રિત કરવું જોઈએ.
અંડર-૧૭ મહિલા ફૂટબોલ વર્લ્‍ડ કપ ૧૧ થી ૩૦ ઓક્‍ટોબર સુધી ભુવનેશ્વર, ગોવા અને મુંબઈમાં યોજવાનો પ્રસ્‍તાવ હતો. તેના સફળ આયોજન માટે, કેન્‍દ્રીય કેબિનેટે જવાબદારી પત્ર પર હસ્‍તાક્ષર કરીને તેની મંજૂરી આપી દીધી હતી. જો કે, હવે FIFAના પ્રતિબંધના પરિણામે, ૧૧-૩૦ ઓક્‍ટોબર દરમિયાન યોજાનાર આગામી FIFA U-17 મહિલા વર્લ્‍ડ કપને મોકૂફ રાખવામાં આવશે. ફિફાએ કહ્યું કે ટુર્નામેન્‍ટનું ભાવિ યોગ્‍ય સમયે નક્કી કરવામાં આવશે અને જો જરૂર પડશે તો આ મામલો બ્‍યુરો ઓફ કાઉન્‍સિલને મોકલવામાં આવશે. FIFA એ સ્‍પષ્ટ કહ્યું છે કે હવે આ ઈવેન્‍ટ ભારતમાં તેના નિર્ધારિત સમય મુજબ યોજી શકાય નહીં. ફીફાએ કહ્યું કે ભારતીય ફૂટબોલ ફેડરેશન સાથે મળીને કામ કરશે તો જ સસ્‍પેન્‍શન હટાવવામાં આવશે.