Gujarati News

નવી દિલ્હી: ‘ખેલો ઈન્ડિયા સ્કૂલ ખેલ’ની સફળતાને જોતા સ્પોર્ટ્સ મંત્રાલયે કોલેજના સ્ટૂડન્ટ્સને તેમાં સામેલ કરવાનો અને તેનું નામ ‘ખેલો ઈન્ડિયા યુથ ગેમ્સ’ કરવાનો નિર્ણય લીધો અને આગામી તબક્કાની યજમાની મહારાષ્ટ્રને સોંપી. કેન્દ્રીય સ્પોર્ટ્સ મિનિસ્ટર રાજ્યવર્ધન સિંહ રાઠોડે મહારાષ્ટ્રના શિક્ષણ તેમજ ખેલ મંત્રી વિનોદ તાવડેની ઉપસ્થિતિમાં આ ખેલોની યજમાની રાજ્યના પુના શહેરને આપવાની જાહેરાત કરી.

ખેલો ઈન્ડિયા યુથ ગેમ્સનું આયોજન આવતા વર્ષે 9થી 20 જાન્યુઆરી સુધી થશે, જેમાં દેશભરમાંથી લગભગ 9 હજાર ખેલાડીઓનું રજિસ્ટ્રેશ કરાયું છે. રાઠોડે કહ્યું કે, ‘ગત વર્ષે દિલ્હીમાં આયોજિત કરાયેલા ખેલો ઈન્ડિયા સ્કૂલ ગેમ્સની સફળતાને જોતા આ વખતે ત્રણ રાજ્યોએ તેના આયોજનની બોલી લગાવી હતી, પરંતુ મહારાષ્ટ્રે બાજી મારી લીધી.’ તેમણે કહ્યું કે, ‘ગત વર્ષે ખેલો ઈન્ડિયા સ્કૂલ ગેમ્સ કેટલી સફળ રહી, તેનો અંદાજ તેના પરથી લગાવી શકાય છે કે 2019માં રમાનારા ખેલોની યજમાની માટે ત્રણ રાજ્યોએ બોલી લગાવી હતી, પરંતુ મહારાષ્ટ્રે આસામ અને ઝારખંડને પછાડી તેની યજમાની મેળવી લીધી.’

તેમણે કહ્યું કે, ખેલો ઈન્ડિયા સ્કૂલ ગેમ્સનો હેતુ નાની ઉંમરના ખેલાડીઓને એવું મંચ આપવાનો છે, જ્યાં તેઓ આંતરાષ્ટ્રીય માહોલમાં પોતાની પ્રતિભા બતાવી શકે. તેની સફળતાને જોતા સરકારે તેમાં કોલેજના વિદ્યાર્થીઓને પણ સામેલ કરવાનો નિર્ણય કર્યો, જેનાથી વધુમાં વધુ યુવાનોને આ ખેલોમાં પોતાની પ્રતિભા બતાવવાની તક મળી શકે.

તેમણે કહ્યું કે, ‘મને એ જાહેરાત કરતા ગર્વ થઈ રહ્યો છે કે દ્વિતીય તબક્કો મહારાષ્ટ્રના પુનામાં થઈ રહ્યો છે. વડાપ્રધાને વિચાર આપ્યો અને અમે આ અભિયાનને એમ વિચારીને શરૂ કર્યુ કે, દેશમાં એવું આંતરાષ્ટ્રીય વાતાવરણ ઊભું કરવામાં આવે, જ્યાં નાની ઉંમરના ખેલાડીઓને તક મળે અને તે પોતાની પ્રતિભા બતાવી શકે. એ જ સમયે અમે તેમની ઓળખ કરવા તેમને સગવડ આપી શકીએ, કેમકે આ ઉંમરના ખેલાડીઓની મદદ માટે કોર્પોરેટ જગત આગળ નથી આવતું.’

રાઠોડે કહ્યું કે, ‘હવે આ ગેમ્સ બીજા વર્ષે આયોજિત થવા જઈ રહી છે અને અમે તેને ખેલો ઈન્ડિયા સ્કૂલ ગેમ્સથી આગળ વધારીને ખેલો ઈન્ડિયા યુથ ગેમ્સ બનાવી દીધી છે. તેમાં સ્પર્ધાના બે વર્ગ હશે. ગત વર્ષની જેમ અંડર 17 વર્ગ ઉપરાંત આ વખતે અંડર 21 વર્ગની સ્પર્ધા પણ થશે. ગત વર્ષે આ ખેલોમાં લગભગ સાડા ત્રણ હજાર ખેલાડીઓએ ભાગ લીધો હતો. એ સમયે લોકોને આશંકા હતી કે અમે તેનું યોગ્ય રીતે આયોજન નહીં કરી શકીએ, પરંતુ હવે બધાને વિશ્વાસ છે કે અમે શાનદાર રીતે તેનું આયોજન કરી શકીશું. આ વખતે ખેલો ઈન્ડિયાના 9 હજાર ખેલાડી રજિસ્ટર થયા છે.’

આ પ્રસંગે રાઠોડે ઓલમ્પિક પદક વિજેતા સુશીલ કુમાર ઉપરાંત છેલ્લા કેટલાક સમયમાં આંતરાષ્ટ્રીય સ્પર્ધાઓમાં શાનદાર પ્રદર્શન કરનારા ખેલાડીઓ જેમકે, મનુ ભાકર, જેરેમી લાલરિનુંગા, લક્ષ્ય સેન, લક્ષ્ય શ્યોરાણ, ઈશા સિંહ, તબાબી દેવી અને શ્રીહરિ નટરાજની ઉપસ્થિતિમાં આ ખેલોની ટી-શર્ટ લોન્ચ કરી. યજમાની મળવા પર ખુશી વ્યક્ત કરતા તાવડેએ કહ્યું કે, ગત વર્ષે ખેલો ઈન્ડિયાનું આયોજન થયા બાદ રાજ્ય સરકારે તેની યજમાની મેળવવાનું નક્કી કરી લીધું હતું. તેમણે કહ્યું કે, ‘અમે ગત વર્ષે જ તૈયારી કરી રહ્યા હતા. આ આયોજનથી ભારત અને ખાસ કરીને મહારાષ્ટ્રમાં ખેલ સંસ્કૃતિ વિકસિત કરવામાં મદદ મળશે.’